Drugbust-shootout!
CEBU, Philippines - Upat ang patay samtang duha ang sikop ug usa ang nakaikyas atol sa nahitabong shootout sa barangay Pulpogan lungsod sa Consolacion pasado alas-5 kaadlawon kagahapon.
Ang mga namatay mao silang Vicente Judaya; Ian Siacol; Jerson Resma; ug Reneboy Tariao samtang ang nasikop mao usab silang Jerry Bugtay ug Elvira Manlise. Nakaikyas usab ang giingong leader sa grupo nga si Francisco Ariva.
Ang kapolisan mipatuman sa search warrant nga giluwatan ni Mandaue City Branch 56 Teresita Abarquez Galanida batok nila ni Judaya, Bugtay, Manlise ug Ariva.
Ang mga sakop sa Regional Intelligence Division (RID), Regional Anti-Illegal Drugs Special Task Group (RAIDSOTG) ug Provincial Intelligence Branch (PIB) milusad og operasyon batok sa mga drug pushers ug guns-for-hire diha sa maong barangay.
Matud pa dihang gi-serve ang search warrant sa panimalay ni Judaya giingong mibunot kini og pusil maong giunhan sa pagpusil sa mga polis.
Samtang nagbinuthanay sa panimalay ni Judaya, nagsipa-sipa usab ang buto sa panimalay ni Ariva dihang ang tulo nga namatay nga silang Siacol, Resma ug Tariao nga mga sakop niini giingong nakigpinusilay sa kapolisan.
Ang upat daling gidala sa Eversely Child Sanitarium Hospital sa dakbayan sa Mandaue apan pulos sila namatay.
Ang kapitan sa maong barangay nga si Roger Linaboc mihulagway sa mga suspek ug ni Ariva nga mga ‘boluyagon’ sa ilang dapit tungod sa pagpamaligya og ilegal nga drugas.
“Kun sagbot sa katilingban hisgutan, aw mas arang-arang gyud nga naigo pero magpabilin gihapon naa kay at large man (Ariva),†pasabot pa sa Kapitan.
Ang hepe sa kapolisan sa PIB, Supt. Rodulfo Albotra mibutyag nga napugos sila pagpusil sa mga suspek tungod sa ilang pagsukol.
Sumala pa ni Albotra ang grupo ni Ariva ug ang gidudahan usab nga guns for hire leader ug drug personality sa Consolacion nga si Bebot Pepito kinsa nakaikyas sa kapolisan miaging semana dunay panagbangi tungod sa “teritoryo.â€
“Illegal drugs are now tapping with guns for hire hired by drug lords,†pasabot pa ni Albotra.
Ang dinakpang si Manlise, mibutyag nga wala siya’y kalambigitan sa illegal nga drugas ug ang iyang kapuyo lang ang nalambigit niini nga si Ariva.
Samtang si Bugtay usab mihimakak sa maong pasangil ug matod pa niya, mikaratil siya og dagan tungod kay nakuyawan siya dihang gipatiran siya sa kapolisan.
Ang officer -in -charge sa Eversely Child Sanitarium, Dr. Phytagora Zerna mipadayag nga kasagaran sa mga igo sa biktima tiyan, kilid ug tiil.
Narekober sa kapolisan ang pito ka dagkong pakete sa gituohang shabu; laing 346 ka gagmay’ng pakete; duha ka medium size; usa ka armas sa .357; duha ka kalibre .45 pistola; usa ka kalibre .380; usa ka kalibre .38; usa ka kalibre .9mm pistol ug tulo usab ka hand grenades. (/EIM)(BANAT NEWS)
- Latest
