UNA rally gipaabot dugokon, apan mga kaatbang maniid

CEBU, Philippines - Gipaabot nga dagsaon og mga supporters gikan sa probinsya sa Sugbo ug Cebu City ang proclamation rally karong adlawa sa mga sakop sa United Nationalist Alliance diha sa Plaza Independencia sa siyudad sa Sugbo.

Mangulo sa proclamation rally si Bise Presidente Jejomar Binay ug ang kinatibuk-ang lineup sa senatorial slate niini.

Gipaabot nga motambong usab si kanhi presidente Joseph Estrada ug Senate President Juan Ponce Enrile.

Samtang si Cebu City Mayor Michael Rama mipahibalo nga tugutan  niya pagpagamit ang mga sakyanan nga giisyu sa mga barangay alang niadtong mga gustong motambong sa rally.

Matud pa ni Rama ang mga organizers mihangyo nga gamiton ang mga “Kaoshiung” ug “Yokohama” buses aron hakuton ang ilang mga supporters.

Ang pagpagamit niini matud pa ni Rama makiangayon lang tungod kay dili kini eksklusibo alang lang sa paghatud og lubong, kasal ug pagpangaligo’g sa dagat.

Apan mibahad nang daan ang numero unong kritiko ni Rama nga si Cebu City South District Rep. Tomas R. Osmeña nga makaatbang niini sa piniliay nga pasakaan niya og kaso ang mayor kung ipagamit niini ang mga sakyanan sa gobiyerno sa maong kalihokan.

“We will target specific barangay captains of Inayawan, Pamutan, Sapangdaku, Lahug, Mambaling, Suba, Agsungot, Binaliw, San Jose, Day-as, Sudlon-1, Buot-Taup, Sambag-1. Violation of election code is a mandatory jail sentence and perpetual disqualification from holding of public office,” bahad pa ni Osmeña.

Si Cebu City north district election officer Marchel Sarno mipasabot nga ang paghatag og “free ride” alang sa usa ka partisan political activity gidili ilawom sa Section 31 sa Republic Act 9006 o Fair Election Act.

Samtang apektado usab ang trapiko diha sa mga dalan duol sa Plaza Independencia ilabi na sa  alas- 3 sa hapon.

Kini ang  mga dalan mao ang M. J. Cuenco Avenue;  Plaza Independencia side gikan sa Malacañang Sa Sugbo hangtud sa Legaspi Extension; M.J. Cuenco Avenue;  Arellano Blvd.;  Serging Osmeña Blvd.; R. Palma Street.

Samtang dul-an usa ka gatos ka polis ug traffic enforcers ang ipakatap sa palibot sa venue. (Rene Borromeo ug Niña Sumacot sa The Freeman/EIM) (BANAT NEWS)