Pasangil nga nanuyop gipusil, gihimakak

CEBU, Philippines - Hugtanong gihimakak sa amo sa usa ka piyado  sa usa  ka  manokan  kinsa gipusil  patay  didto sa  Poblacion lungsod sa Compostela niadtong Sabado sa kaadlawon ang report sa kapolisan nga gikan kini nga nanuyop.

Ang biktima nga si Edmar Neri alyas Bodoy, hingkod,  namatay  pag-abot niini  sa tambalanan human pusila  sa wala  hiilhing  armadong  tawo  nga nagsakay  og  motorsiklo didto  sa maong  lugar.

Sumala sa pamahayag  ni Warren Paradiang  alyas  Waway  kinsa  nakasaksi  sa maong  hitabo  kay  kuyog  man  siya  ni Bodoy, nga  mihunong  sila  sa maong  lugar  kay nagpalit  siya  og  sigarilyo sa duol  nga tindahan    dihang  giluthang  ang      biktima.

Sa unang pakisayud  ning  tigbalita gikan ni PO3 Dino Caputol, mipadayag  og  katahap  ang  maong  polis  nga “posibling” gikang nanuyop ang biktima   ug  ang  kauban  niini  sa wala pa ang hitabo.

Apan   gipanghimakak kini  ni  Rudolfo Bughao, 43, minyo  nga  taga Cabadiangan, Compostela,  ig-agaw ug maoy  amo sa biktima.

Si Bughao  nga  na-interview  sa Banat News  pinaagi  sa cell phone   nagkanayon  nga  dakong  sayop  ang  gipahayag  sa polis  ug  dili  tinuod  nga  gikan  nga  nanuyop  ang  biktima  ug  ang  kauban  niini.

Iyang giklaro nga ang biktima mituyo og lugsong sakay sa motor uban ni  Warren aron unta  maglukat sa iyang kwentas nga naprinda sa   usa  ka pawnshop  sa maong lungsod.

Kini human niya hatagi og P4 mil  niadtong Biyernes   kay  nahalinan  siya  og mga manok igtatari.

Matud ni Bughao  nga  samtang paingon na  untang mopauli  ang biktima ug si Warren pag-abot sa maong lugar gipara sila sa mga drayber  sa habal- habal  kay adunay ibaligya nga cell phone.

Busa napugos  kini  og  hunong    ug  nanaug  usab    si Warren  kay mipalit  og  sigarilyo  sa   duol  nga tindahan.

Apan  kalit  lang  milanog  ang  buto  sa armas  de  fuego  ug  paglingi  ni Warren  nalup-og  na  ang  biktima  samtang walay  nakasulti kun kinsay  milutang  niini.

Busa gisakwat  ni Warren  ang  biktima  ug nagpakitabang siya  sa  mga  drayber  sa habal-habal  sa maong  lugar sa paghatud  ngadto  sa tambalanan     apan  nakabsan  na  kini  sa kinabuhi sa paghiling  sa mga  doktor.

Matud ni Bughao nga iyang  giklaro ang maong report nga dili  tinuod  nga gikang  nanuyop  ang  biktima  kay  wala kini magbisyo  og gidiling  drugas.

Midugang  siya  nga     unom na  ka  tuig  nga nagtrabaho  isip iyang    piyado  sa iyang  manokan  ug nasuta  niya  ang  tinarong  nga serbisyo  niini.

Kagahapon gipakigkitaan ni Bughao ang kapolisan sa Compostela   ug  didto  iyang  gipanghimakak   ang  pamahayag sa  kapolisan  nga napatik  ning  pamantalaan. (BANAT NEWS)