Motor vs. Lancer 1 patay 1 angol

CEBU, Philippines - Namatay ang uyoan ug kritikal ang pag-umangkon  niini human  modasmag   ang  ilang gisakyang  motorsiklo  sa  gikasugat   nila nga sakyanan didto sa highway sa Sityo Lutaw barangay Estaca lungsod sa Compostela niadtong Domingo sa alas 4:20 sa hapon.    

Ang   namatay   mao   si Joel Tellor, 29, nagpuyo sa V. Rama siyudad sa Sugbo,  samtang  si Alvin Tellor, 31, minyo, silingan   ug  pag-umangkon  sa namatay  anaa  sa talandugon  nga            kahimtang.

Samtang ang drayber sa Mitsubishi Lancer nga  may  plaka nga PLS-744  mao  si Idel Gansan, 34   nga  taga Jaica Poblacion, lungsod sa Compostela.

Si PO3 Necavero Balberde sa Compostela Police   Station  mibutyag  sa Banat News   nga  nagpaingon sa norte nga bahin sa  lalawigan   ang  Mitsubishi Lancer, samtang kasugat  niini ang   motorsiklo   nga  gimaneho  ni Alvin Tellor  nga  nagpaingon sa siyudad sa Sugbo.

Apan  sa  pag-abot  sa maong  lugar nga nahitaboan   mikawat sa pikas lane  sa karsada  ang motorsiklo ug naapiki  kini  sa gikasugat  nga  sakyanan  ug  wala  na  makontrolar  ni  Alvin  ang  motorsiklo  hinungdan  nga  midasmag  gayud  kini  sa gikasugat  niini nga  Lancer.

Nangalagpot   ang mga biktima gikan sa ilang motorsiklo   ug   mitugpa  kini  sa sementadong  karsada  apan  nagrabihan  sa  pagkadakdak  ang  ulo  ni  Joel  nga maoy  hinungdang    gideklarar  kining  patay  na sa paghiabot  didto sa Danao  District  Hospital.    

Samtang   si Alvin  gidala  sa  tambalanan  sa dakbayan  sa Sugbo  ug  ang  driver  sa Lancer  mitahan  dayon  ngadto  sa kapolisan  sa   Compostela. (BANAT NEWS)