Ordinansa alang sa batang libud-suroy giumol

CEBU, Philippines - Ang pag-atiman sa mga libud-suroy   nga kabataan  maoy  usa sa   mga  gimbuhaton  nga  hatagan  sa kagamhanan sa dakbayan  sa Mandaue og pagtagad. 

  Kini  pinaagi sa  usa ka  ordinansa  nga  giumol  sa konseho  sa maong  syudad  nga  magsugyot  sa pagtaud  og donation  box  nga maoy  sudlan  sa  mga hinabang  sa publiko  ngadto  sa mga  batang  libud-suroy.

Si Konsehal Demetrio Cortes Jr. nga maoy nangamahan sa maong ordinansa mipasabot nga usa ka maayong alternatibo ang pagbutang og donation box   alang sa mga street children.

Matud  pa  niya  nga nagtuo  sila  nga  kining  mga bataa mahimong  gamiton  sa panguwarta sa pipila ka mga badlongon sa katilingban.

Sa   ordinansa  nga  gipaila  ni Cortes , higpit  nga nagdili ni bisan kinsa  sa paghatag og limos sa kabataan nga magpakilimos  sa mga tawo  sulod sa mga kan-anan .

Dugang nga gidili sa maong ordinansa mao ang paghatag og sinsiyo  ngadto sa mga bata nga mag-car watcher   kay  usa  kini ka matang  sa   tong collection.

Gimandoan  usab ang kapolisan ug ang buhatan sa City Social Welfare and Development sa paghipos sa mga libudsuroy nga kabataan nga mangligdas  lang   sa daplin sa kadalanan  ug  anha  na  matulog  magbuntag.

Si  Chief Inspector Michael Anthony Bastes nga maoy hepe sa Investigation and Detection Management Bureau sa Mandaue City Police Office hugtanon nga  misuporta sa maong gisugyot nga ordinansa.

Nasayran nga si Chief Inspector Bastes usa sa mga opisyal sa kapolisan kansang adbokasiya mao ang paghatag og kaayohan sa mga bata aron  mahimo  silang  mapuslanon  sa katilingban. (WC) (BANAT NEWS)