Bus ug mini-bus operators malaumong pa-ubsan ni Magpale ang terminal fees
CEBU, Philippines - Malaumon ang Cebu bus ug mini-bus operators nga paminawon ug tugotan ang ilang hangyo sa Kapitolyo nga paubsan ang presyo sa parking fee diha sa South Bus Terminal. Si Julito Flores, ang presidente sa Cebu South Mini-Bus Operators Association nagkanayon nga daw nakabatyag sila og positibong tubag gikan ni acting governor Agnes Magpale niadtong adlaw nga Biyernes.
"Naa nay figure kung pila ang reduction pero nagtoo man si Magpale nga ang bus operators ra ang nangayo og reduction walay labot ang mini-bus, so iyaha pang i- meet ang Economic Enterprise Council next week about it," ni Flores pa.
Sumala pa sa mga bus ug mini-bus operators ang bag-ong gipangayong parking fee sa terminal dako ra kaayo alang kanila.
Kataposang bahin sa bulan Oktubre dihang gipatuman sa Kapitolyo ang bag-ong parking fees nga gikan P100 gihimo kining P200 matag sulod sa bus ug mini-bus ug P20 sa taxicabs gikan sa P10.
Mihangyo karon ang mga bus ug mini-bus operators nga paubsan kini gikan P200 ngadto nalang sa P150 sa buses ug P200 ngadto sa P140 sa mini-buses.
Niadtong bulan sa Nobiyembre mipadala og suwat ang mga bus operators nga naghangyo kang Gov. Gwendolyn Garcia, kinsa gisuspenso na karon sa pagka-gobernador, apan wala kini paminawa.
Ang maong terminal adunay 230 bus ug mini buses nga mobiyahe matag adlaw gikan sa habagatang bahin sa lalawigan.
Si Flores daan nang mibahad nga kung dili ihatag sa Kapitolyo ang ilang hangyo karon posibleng ilang i-implimentar ang naaprubahan kaniadto sa Land Transportation Franchising and Regulatory Board nga P8.50 sa unang lima ka kilometro ug P1.45 sa kada mosunod nga kilometro.
Sa pagkakaron nag- undercharging ang mga operators ug P6 ray ilang gipaningil sa minimum sa unang lima ka kilometro ug P1.20 sa matag mosunod nga kilometro. (BANAT NEWS)
- Latest
