CEBU, Philippines - Nasikop sa kapolisan ang usa ka 17 anyos nga bayong-bayong kinsa giingong miunay og lugos sa 15 anyos nga dalagita nga ig-agaw ra usab niini didto sa lungsod sa Dalaguete niadtong Martes sa buntag.
Ang suspek nga misuway sa pag-ikyas didto hidakpi sa Barangay Mantalongon sa ila mismong pinuy-anan.
Gipangunahan ni Insp. Dexter Basirgo ang hepe sa Dalaguete Police Station ang team sa kapolisan nga nangita sa suspek, hinungdan nga wala kini makaeskapo gikan sa kamot sa mga otoridad.
Matud pa ni Basirgo nga segun sa imbistigasyon nga ilang gihimo, nasuta nga nagkuyog ang duha, (biktima ug suspek) nga nanglakaw pauli sa ilang tagsatagsa ka panimalay dihang nahitabo ang lugos. Mitug-an ang biktima nga pag-abot nila sa awaaw nga lugar, kalit nga gikuptan sa suspek ang iyang kamot dayon gidul-itan niini og kutsilyo ang iyang hawak uban sa pasidaan nga kun mobalibad siya iyang lubaon. Ang biktima kinsa nahadlok nga patyon, walay nahimo gawas sa paghubo sa iyang hapin sa lawas agi og pagtuman sa gimando sa suspetsado dayon milampos ang naulahi sa iyang hinayop nga tinguha.
Human matagbaw ang suspek ug naluya na, nakahigayon pagdagan sa ilang balay ang biktima ug daling misumbong sa iyang mga ginikanan sa nahitabo kaniya.
Dihadiha gipahibawo usab dayon sa mga ginikanan ngadto sa kapolisan ang maong hitabo hinungdan nga gilusad dayon ang hiniusang pagpangita niini sa suspetsado.
Kaso nga rape subay sa RA 7610 o Special Protection of Children Against Abuse, Exploitation and Discrimination Act ang gipasaka na kagahapong adlawa ngadto sa Cebu Provincial Prosecutor’s Office batok sa suspek. Base sa eksaminasyon nga gihimo sa doktor sa Don Vicente Sotto Memorial Medical Center ngadto sa biktima nasuta nga adunay laceration o gisi ang kinatawo sa biktima. (BANAT NEWS)