Kamatayon sa piniriso way foul play

CEBU, Philippines -  Way foul  play  nga nakita  ang kapolisan  sa paghikog sa usa ka piniriso sa Mandaue City Jail sa milabay’ng semana.  Ang nagtubok  sa kaugalingon  nga  si anhing  Jimmy Guido, hingkod , nga taga  Brgy. Labugon dakbayan sa Mandaue  nag-atubang   sa  kaso  nga  may  labot  sa gidiling  drugas . 

Matud pa ni P/ Insp. Ramil Morfus sa Mandaue City  Police  Office  nga   dihang  ilang gisusi  ang patay’ng  lawas  ni Guido, ilang  nasuta nga hikog gyud ang hinungdan  sa kamatayon  niini.

Kini  tungod  kay  wala  silay  mga  timailhang  nakita  nga  gituyo  sa pagpatay  ang  nahisgutang  binilanggo.

Subay niini pipila ka mga piniriso ang mipadayag nga sa wala pa mahitabo ang paghikog, si  Guido daan na kining nagmulo sa iyang sakit   nga  diabetis   nga  nagpasabot  sa iyang  kabalaka  sa   iyang  kahimtang.

Gisubay  usab  niini  ang  iyang  kasagmuyo   nga  matud  pa miduwa  og  laing  team   ang iyang kapuyo hinungdan sa paghikog niini.

Kahinumdoman nga mga  alas  6:45 sa buntag sa milabay’ng Biyernes napalgan na lang sa mga kaubang  binilanggo  si Guido nga nagbitay gamit ang usa ka liston sa sapatos nga gihikot sa liog niini.

Gisuwayan pa kini og luwas sa iyang mga kauban apan patay na kini nga nakadangat  sa tambalanan

Gumikan niini hugot nga gimonitor karon sa mga sakop sa Bureau of Jail Management and Penology  ang mga kagamitan sulod sa maong bilanggoan nga mahimong gamiton  sa  piniriso  nga  buot  maghikog. (BANAT NEWS)