Cordova 3 nalay mag-mayor

CEBU, Philippines - Nagkadako ang kahigayonan nga  mahimong tulo na lang  ang magsakbang sa pagka mayor sa lungsod sa Cordova sa 2013 mid-term election karong  gibasura   na sa Commission on Election ang kandidatura  ni boxing  promoter  Rex “Wakee” Salud.

Ang magsinug-ang   nga kandidato  sa pagka mayor  mao sila si Mayor Adelino Sitoy sa Liberal Party, Bise Mayor Rodrigo “Dodie” Jumao-as sa One Cebu Party ug Johnson Tan Jr. sa partido independente.

Hinuon si Salud nga nahinabi sa mga tigbalita miingon  nga  di pa  siya  mosurender bisan  gipalukapa  na  siya  sa Comelec  kay  mobangon  pa  gihapon  siya  ug  mosukol   og  kombati.

Matud  pa  niya  nga adto  niya  ipakita  ang  iyang  maayong  abilidad  sa korte apan  kun  mapildi  gayud  siya, si Tan  maoy iyang  tabangan  nga mahimong  mayor  sa Cordova  ug  ibuhos  niya  ang  tanan niyang  rekurso  alang  sa  kadaogan  niini.

Si Salud  nawad-an  na  sa katungod  nga  mokandidato  sa  pagka-mayor  sa Cordova  human  ibasura  sa Comelec  ang  Certificate  of Candidacy   dihang  namatud-an  nga  wala  diay  kini  magpuyo  sa  maong    lungsod. (BANAT NEWS)