P10M gigasto sa dayan-dayan sa Pasko sa Mandaue
CEBU, Philippines — Niggahin og kapin P10 milyones ang Mandaue City Government alang sa dekorasyon sa Pasko karong tuiga nga adunay temang Fantasy Land, mas dako kumpara sa P9 milyon nga budget niadtong miaging tuig, sumala ni Mayor Thadeo Jovito “Jonkie” Ouano.
MatUd ni Ouano, gamiton ang dugang nga pUndo aron masuportahan ang mas lapad nga Christmas display karong tuiga sa palibot sa City Hall ug sa lima ka dagkong kadalanan sa siyudad.
“Mas taas lang siguro ni siya gamay. Siguro mga last year murag mga P8 to 9 million. Unya karon mga P10 to 12 siguro, slightly higher gamay,” matUd ni Ouano sa usa ka interbyu.
Naa na sa 80 porsiyento ang pagpangandam sa siyudad alang sa selebrasyon sa Pasko.
Magpahigayon og test lighting sa Domingo sa gabii, Nobyembre 22, usa ka adlaw sa dili pa ang opisyal nga pagpasiga sa mga dekorasyon sa Lunes, Nobyembre 23.
Abli na sa publiko sugod Lunes ang Fantasy Land-themed Christmas attraction human sa seremonya sa pagpasiga sa Christmas tree. Pinaagi niini, makabisita ang mga Mandauehanon sa gidekorasyunang City Hall grounds ug makagahin og panahon uban sa ilang pamilya ug mga higala.
Dili lang sa palibot sa City Hall kutob ang dekorasyon karong tuiga kay butangan usab og Christmas lights ang lima ka dagkong kadalanan sa siyudad, lakip ang Ouano Avenue, UN Avenue, A.S. Fortuna Street, A.C. Cortes Avenue ug M.C. Briones Street.
Matud ni Ouano, gigamit pag-usab sa siyudad ang pipila ka materyales gikan sa dekorasyon sa miaging tuig, samtang nagsugod na usab sila sa pag-andam sa mga bag-ong instalasyon niadtong Agosto. (BANAT NEWS)
- Latest















