Korean gitulis ug gidunggab sa laing 2 ka Koreano

CEBU, Philippines - Usa ka Korean national ang nabiktima sa pagpanulis ug nadunggaban pa gyud sa gihulagway sa biktima nga mga Koreano ra usab diha sa Archbishop Reyes Avenue, sa dakbayan sa Sugbo, Huwebes sa kaadlawon.

Ang biktima mao si Jun Beoh Jun Ku, 28, temporaryong nagpuyo sa Holiday Spa sa Sitio Kamagong, Barangay Kamputhaw ning dakbayan.

Matud ni SPO3 Henry Estoy nga maoy responding officer sa panghitabo, gikan si Jun Beoh sa usa ka bar diin nagtrabaho ang uyab niini nga Filipina ug nananghid nga mo-una na kini sa pag-uli.

Dugang ni Estoy nga samtang naglakaw sa maong lugar kalit lang nga may niabot nga duha ka wa mailhing Koreano sa iyang luyo ug gitiunan siya og kutsilyo dayong deklarar nga hold-up.

Apan nisukol ang biktima ug wa gihatag ang iyang mga kabtangan hinungdang gidunggab kini sa mga suspek diha  sa iyang lawas, kamot, ug sa nawong.

Hinuon nakadagan pa pagbalik sa gitrabahoan sa uyab si Jun Beoh ug gitabangan sa uyab nga si Wanda Alcantara  ug gidala kini sa Perpetual Succor Hospital.  “Nailhan ni sila nga mga Koreano kay nag ‘Kinorean’ man kini samtang nang hold-up,” matud ni SPO4 Ernesto Panaligan usa sa mga imbestigador sa maong kaso. (Jenifer Mular, USJR Intern/EIM) (BANAT NEWS)