Retired police Col. Napaig

CEBU, Philippines - Napaig ang usa ka retiradong  polis human matanggong  sulod sa iyang  sakyanan  nga nasunog  didto sa sitio Cantipla 11, barangay Tabunan, siyudad sa Sugbo niadtong Martes sa gabii.

Ang  biktima  mao  si Retired Col. Salvador Sanchez, usa ka kanhi jail warden sa Cebu Provincial Detention and  Rehabilitation Center   (CPDRC)  sa wala  pa  kini  moretiro  sa katungdanan.

Ang  mga  nakasaksi  sa maong  hitabo nga sila  si Albert Bacus, Lindo Ardiente ug Theresa Almendras,  mga molupyo  sa dapit  nga  nahitaboan  ug  mga  mag-uuma  usab  nagkanayon  nga  sa  wala  pa masunog  ang multicab  sa biktima, nakadungog  sila  og  sipa  kaayong  boto.

Matud  pa  ni Almendras  nga  napakgang  ang  ilang  pagpanihapon  sa maong  higayon  gumikan  sa kakurat  nila  sa boto.

Bisan  nagduda  sila  nga gikan  ra  sa firecracker, apan misil-ing gayud sila  sa karsada ug  didto  nakita  nila  ang  multicab  nga  nagkayo  na.

Migawas  sila  sa balay  ug  didto  nakita  nila  si Sanchez  nga wala  na  maglihok  sulod  sa sakyanan  nga  may  plaka  nga GPY-184.

Si  Bacus  dali  nga  misakay  sa  iyang  motor  ug  nangayo  og panabang   kang barangay konsehal William Radana  sa Tabunan kinsa  maoy  nakatawag  dayon  og  polis. Hinuon  napawong  ang  kayo  apan hapit  na  mahurot  og habhab  niini  ang tibuok  lawas  sa multicab   sa pag-abot  sa mga tanod  sa Tabunan  nga nagdala  og  mga  fire extinguisher,

Samtang  si Partylist Representative Pastor Jun Alcover  kinsa silingan  ni Sanchez  mibutyag  sa Banat News  nga daan  na  nga depektuso  ang sakyanan  ni Sanchez.

Matud  pa  ni  Alcover  nga  didto  siya  masayud niini  sa anak  ni  Sanchez  nga nagpuyo  sa Boy Scout Camp Marina.

Ang  kapolisan  maoy  misakwat  sa patay’ng  lawas  ni Sanchez paingon  sa usa  ka funeral  parlor  sa dakbayan  sa Sugbo.

Sa pagkakaron padayon  pang  giimbistigar  sa kapolisan  ang maong  hitabo  aron pagsuta  sa   hinungdan  sa pagkasunog sa  sakyanan  sa biktima. Susihon  usab  ang anggulo bahin  sa mga pagduda nga  nagpusil  si Sanchez  sa iyang kaugalingon  una  masunog  ang  iyang  sakyanan.

Apan  matud  pa  sa kapolisan  nga  hingpit  nga masayran  kining tanan  human sa autopsy  nga   ipahigayon  sa lawas  sa biktima. (WC)  (BANAT NEWS)