20 mil ka titulo gi-ariya sa DENR
CEBU, Philippines - Ang Department of Environment and Natural Resources (DENR-7) miapud-apod og 20,486 nga libreng titulo alang sa 9, 443.1269 ka ektarya nga di tituladong yuta nga gitikad sa mga mag-uuma nga gitawag nga Untitled Public Alienable nga yuta niadtong Disyembre 26, 2012.
Kini ubos sa Comprehensive Agrarian Reform Program (CARP) Extension Program sukad pa sa Disyembre 26, 2012 sa Central Visayas.
Matud pa ni DENR-7 Regional Executive Director Isabelo Montejo nga kini usa ka dakong kalampusan sa rehiyon ug usab sa tibook nasud sa natad sa pagpatitulo og yuta sa goberno. Sa kinatibuk-ang mga titulo sa yuta nga gipang-apod-apod ubos sa CARP, ang probinsya sa Sugbo nakahikay ug nakaluwat og 4, 896 ka titulo sa yuta nga alang sa 2,394.5184 ka ektarya.
Ang lalawigan sa Bohol naluwatan og 14,254 ka titulo sa yuta nga alang sa 6, 086.0633 ka ektarya, samtang ang Negros Oriental naluwatan og 728 ka titulo alang sa mokabat og 641.6081 ka ektarya , ug ang probinsya sa Siquijor naluwatan og 608 ka titulo sa yuta alang sa 320.9371 ka ektarya.
Subay sa Republic Act No. 3844 o Agricultural Land Reform Code, ang DENR maoy responsabli sa pagpang-apud-apod og titulo sa yuta ngadto sa mga mag-uuma nga nakapadeklarar ug nagtikad sa maong mga luna. -/WC (BANAT NEWS)
- Latest
