Mosyon ni Salud gibasura

CEBU, Philippines - Human ma- knockout si  Manny Pacquiao, na- double knockout usab ang iyang Sugboanon nga suod nga higala nga si Rex Wakee Salud, apan dili sa boxing kun dili sa motion  for inhibitition ug    sa ikaduhang  application for transfer of registration niini didto sa lungsod sa Cordova.

Kini human ang Election Registration Board (ERB) sa Cordova mibasura sa motion for inhibition nga giduso ni Salud batok sa duha  sa tulo ka mga sakop sa board nga sila si Ronilo Baguio ug Liza Maningo.

Ang  duha  ka  mga  opisyal  sa Comelec sa sayo  pa   gipasanginlan ni Salud nga bias kay pabor kuno kini  sila ngadto ni Mayor Adelino Sitoy  sa maong  lungsod.

Ang desisyon sa ERB sa  pagbasura sa maong duha ka mosyon ,giluwatan niadtong Nobiyembre  27  apan gipagawas   niadto  lang  Disyembre 6 karong  human  iduso  ni  Sitoy  ang  iyang  mosyon  sa pagsupak  sa  mosyon  ni  Salud.

Ang maong mosyon sa  sayo  pa  giduso ni Salud sa Comelec Manila apan giduso  kini og balik   sa ERB Cordova aron  sa pagsulbad  niini.  Lakip  nga  gibasura sa ERB   mao  ang  ika-duhang  pag-apply  ni Salud  og  transfer  sa iyang  rehistrasyon  sa Cordova aron  adto  na  siya  mobotar  sa maong  lungsod sa  umaabot  nga election.

Apan napakyas  siya pagkombinse sa ERB luyo  sa maayo  kaayong pagkahan-ay  niyang  argumento  ilabina kay ang gidala niining  address  mao ang 1772 B. Punta Princesa, Cebu City.

Gibasehan sa gipakanaog nga desisyon sa ERB mao ang desisyon sa Municipal Circuit Trial Court ( MCTC) Judge Jocelyn Uy-Po niadtong Septembre 11, 2012  nga nagsalikway sa iyang application pagbalhin  og  address sa  Cordova tungod kay wala kini makatuman sa mga panginahanglan.

Ang maong desisyon gitino usab sa Regional Trial Court  (RTC) Judge  Rafael Yrastorza nga mipakanaog og desisyon  niadtong Oktubre 1, ning tuiga human mo-apelar sa maong desisyon ang kampo ni Salud.

Nasayran nga si Salud miduso gyud sa iyang kandidatora pagka-mayor atbang ni  Mayor Sitoy sa Cordova alang sa eleksyon sa sunod tuig bisan pa og napundo  sa korte ang iyang mosyon sa pag-apply niya  og residensiya ngadto  sa Cordova.

Wala pa hinoon makuha-i sa iyang habig si Salud tungod kay atua pa kini sa Amerika misaksi sa away ni Pacquiao ug Marquez ug gitakdang mopauli sa Sugbo ugma, Miyerkules.

(BANAT NEWS)