CEBU, Philippines - Sugdan na karong semanaha ang pag-imbestigar sa mga pari ug kawani sa Our Lady of the Rule National Shrine o Berhin sa Regla Parish sa dakbayan sa Lapulapu nga gilungkab ug gipangawat ang mga alahas sa birhen nga balor og kapin kun kulang P1 ka milyon sa milabay’ng buwan.
Matud pa ni Lapulapu City Police Office Director P/SSupt. Rey Lyndon Lawas nga nakadawat na siya og mensahe gikan sa mga pari sa maong simbahan nga uyon na sila nga mopaubos sa imbestigasyon bahin sa maong insedente.
Si Fr. Jaime Duero ang Kura Paroko sa Birhen sa Regla nagkanayon nga busy lang sila niadtong milabay’ng mga semana hinungdan nga wala lang una sila magtagad bahin sa maong hitabo.
Kini tungod kay ilang gisiguro ang pagpausab sa simbahan aron dili na masudlan og kawatan .
Gumikan niini si SSupt. Lawas mimando ni SInsp. Cristian Torres, ang hepe sa TRS sa kapolisan sa Lapulapu sa pagpahigayon og dugang imbestigasyon kalabot sa pagkahanaw sa mga alahas sa birhen
Lakip nga nawagtang mao ang mga donasyong salapi nga gipanulod sa sobre didto sa duol sa gibutangan sa birhen.
Gumikan niini nalipay kaayo si Mayor Paz Radaza sa maong kalambuan ug nanghinaut kini nga matumbok ang responsabli sa maong hitabo.
Matud pa ni SSupt. Lawas nga mas maayo nga ipaubos sa polygraph test ang tanang mga kawani sa maong simbahan.
Kini tungod kay sa unang pakisusi sa kapolisan nagkadaiya ang pamahayag sa mga empleyado sa simbahan kalabot sa maong hitabo. (BANAT NEWS)