Mipuga sa prisohan sa Davao sikop sa lungsod sa Consolacion

CEBU, Philippines - Usa ka pugante nga mipuga sa Calinan Police Station sa Davao City nadakpan sa kapulisan sa Consolacion sa miaging adlaw sa barangay Jubay, Liloan.

Ang suspek nga si Ricgen Jongco Baniqued, 24, nga temporaryong nagpuyo sa Barangay Tayud, Consolacion, nasikop human makit-i sa asset sa kapulisan diha sa usa ka beach resort sa Barangay Jubay nianang pagkahapon.

Si Baniqued duha ka semanang gipanid-an ug dihang nakompirmar gipahibalo sa kapolisan sa Consolacion ang Calinan Police Station sa Davao nga dali usab mipadala og kopya sa investigation report ug incident report ngadto sa Consolacion police nga maoy gibasehan sa pag-aresto kang Baniqued.

Si Insp. Leo Ty, hepe sa Consolacion Police Station, nagkanayon nga wala una motug-an si Baniqued nga siya kadtong mipuga sa Calinan apan pinaagi sa litrato nga giapil sa pagpadala sa kapulisan sa Davao miangkon na kini.

Si Baniqued nagtrabaho isip barber sa usa ka parlor sa Consolacion samtang siya nagtago-tago.

Si Baniqued nasikop sa kapulisan sa Calinan pinaagi sa buy-bust operation sa miaging tuig ug gipasakaan og kasong kalapasan sa Section 5 sa RA 9165.

Mieskapo si Baniqued pinaagi sa paggabas sa rehas sa prisuhan niadtong Nobiyembre 30. Ang kapulisan sa Consolacion nagpaabot pa karon sa kapulisan sa Calinan nga maoy mokuha kang Baniqued nga temporaryong gitanggong sa karsel. (BANAT NEWS)