Cartographic sketch sa mi-ambush sa ginang gipagawas sa kapolisan
CEBU, Philippines - Duna nay nahipos nga cartographic sketch ang kapulisan sa tulo ka mga gikatahapang nagmotor nga namusil patay sa 50- anyos nga ginang samtang nag-atang kini ug iyang anak og kasakyan sa highway sa Sitio Grayrocks sa barangay Pangdan siyudad sa Naga pipila na ka adlaw ang milabay.
Ang biktima nga si Margarita Capablanca, 50, nakaangkon og 12 ka mga samad pinusilan sa lawas ug ulo kinsa gituohang napagan ra tungod kay ang anak niining si Joel Capablanca, 35, mao untay target.
Si Joel padulong unta niadtong tungora sa husay sa iyang kasong frustrated murder sa korte sa dakbayan sa Sugbo apan kalit silang gipamusil. Si PO1 Nilo Dacles ang imbestigador sa Naga City Police miingon nga ang anak sa biktima nga si Joel nakatabang sa paghatag sa deskripsyon sa dagway sa mga mamumuno hinungdan sa nahulmang cartographic sketch.
Ipang apod-apod unya ang maong cartographic sketch sa nagkadaiyang buhatan sa kapolisan alang sa daling pagkasikop sa mga mamumuno. Ipatawag usab sa kapolisan ang mga nakasungi ni Joel aron sutaon kung may kalambigitan sila sa maong krimen. (BANAT NEWS)
- Latest
