Gipusil patay sa wa hiilhing criminal

CEBU, Philippines - Namatay ang usa ka wala hiilhing lalaki human kini pusila sa usa ka wala usab hiilhing kriminal  didto sa sitio Tunga, barangay Tanke, dakbayan sa Talisay kagahapon  sayo  sa buntag.

Ang biktima gihulagway sa kapolisan sa siyudad nga gibana-banang nagpanuigon sa 30-anyos, 5’5 ang gitas-on sa barog, ug pution ang pamanit kinsa nakaangkon og usa ka samad pinusilan sa tuong bahin sa iyang ulo

Nakuha  sa mga polis gikan sa patay’ng lawas sa biktima ang usa ka pitaka nga adunay sulod nga hulagway ug driver’s license  nga  iya  kang  “Junefer Cabuenas  Mahilum” taga sitio Camp 3, barangay  Jaclupan, Talisay.

Napunitan usab sa mga polis gikan sa lugar nga nahitaboan ang usa ka kabhang sa bala sa kalibre .45 nga pistola.

Sa imbestigasyon sa kapolisan  nasuta nga ang biktima gipusil   sa   usa  ka dapit  nga hagip-ot kaayo  nga karsada sa nahisgutang lugar samtang naglakaw paingon ngadto sa sudlonong bahin sa sitio Tunga.

Human  matumba  sa  yuta  ang  biktima, dali usab kaayong  nakalayas  gikan  sa maong  lugar  ang  kriminal.

Ang kapolisan nagpahigayon   pa og follow-up nga imbestigasyon sa   maong hitabo pagpiho sa hinungdan sa maong pagpamusil ug pag-ila usab sa kriminal.

Samtang  ang  biktima  anaa sa   usa  ka punerarya  sa maong  dakbayan  gipaabot  sa  kapolisan  ang   mga kabanay  nga  mo-claim niini. (BANAT NEWS)