NDRRMC sa Visayas, Mindanao nag-blue alert tungod sa low-pressure area

CEBU, Philippines - Giisa sa mga awtoridad nga gitahasan panahon sa katalagman ngadto sa “blue alert” ang Visayas ug Mindanao sugod kagahapon nunot sa hulga sa flash floods ug landslides nga posibleng epekto sa low-pressure area (LPA).

Ang National Disaster Risk Reduction and Management Council  nagkanayon nga katunga sa ilang mga sakop ang gimandoang kinahanglang mobantay sa ilang tagsatagsa ka mga estasyon aron makaresponde panahon nga dunay katalagman sumala pa sa report sa GMA News Online.

Si NDRRMC head Benito Ramos sa usa ka report miingon nga kinahanglang paninguhaon sa mga sakop sa NDRRMC nga walay makalas sa maong mga pag-ulan ilabi na sa Eastern Visayas, Caraga, ug Region 10 ug 11.

Ang Philippine Atmospheric Geophysical and Astronomical Service Administration (PAGASA) mipasidaan nga ang LPA posibleng magdala og flashfloods ug pagdahili sa yuta ug gibantayan ang posibilidad nga mamahimong usa ka bagyo ang LPA nga giisip nga layo rang mahitabo tungod kay duol kini kaayo sa mga kayutaan.

Gani kagahapon, sa labing unang higayon wala makapahigayon sa tradisyonal nga fluvial procession ang mga deboto sa Birhen sa Regla ang patron sa dakbayan sa Lapulapu gumikan sa LPA nga mimugna og dagkong bawod ug kusog nga hangin nga magbutang og peligro sa mga motorbanca nga molawig. Ang LPA nasigpatan sa Pagasa sa Surigao ug gipaabot nga moabot sa tungatungang bahin sa nasud. Ang Pagasa mipahimangno sa mga gagmay’ng barko o panagatan nga dili mopalayo sa mga kayutaan samtang ang mga dagkong barko gipasidan-an kabahin sa mga dagkong balod.( /EIM) (BANAT NEWS)