Lawas patay sa driver naputos sa pinusilan

CEBU, Philippines - Usa ka drayber  sa habal-habal  kansang lawas  naputos  sa  mga samad pinusilan  gikan  sa ulo  hangtud  tiil ug patay na nga  gibiyaang  nagbuy-od  sa karsada  didto sa bukirang  bahin sa Sitio Pilihan, barangay Obong, lungsod sa Dalaguete kagahapon sa alas 6:50 sa buntag.

Ang biktima kansang lawas  patay  tupad  sa natumba niyang  motorsiklo  mao si Jose Wilson Quivedo, 34 , ulitawo apan adunay kapuyo,  nga  taga barangay Hulomaynon sa maong  lungsod ug drayber  sa habalhabal  kinsa  gipatay  sa wala  hiilhing  kriminal.

Matod ni SPO1 Veronico Centino, desk officer sa Dalaguete Police dihang nahinabi sa Banat News ang mga kaubang habalhabal drayber mao nay nakadiskobri sa biktima nga nagbuy-od nga nagkadugo ang lawas tupad sa iyang motor taliwa sa karsada.

Nasayran  sa kapolisan nga  ang  biktima naghatud og pasahero didto sa Sitio  Pilihan  ug  sa pagbalik  niini,  wala  na siyay  pasahero  hinungdan  nga nakahigayon  ang kriminal  sa pagbanhig  kaniya  pag-abot  sa dapit  nga nahitaboan.

Apan laing  tiyorya  sa  kapolisan  mao  nga  malagmit  giunay  kini og patay  sa iyang pasahero.

Ang biktima nakaangkon ug samad pinusilan sa iyang ulo,  paa ug batiis nga maoy nakaingon sa iyang hinanali nga kamatayon.

Usa ka kabhang sa bala sa kalibre .45 nga  pistola ingon man nalumping  nga  bala  sa  kalibre .45 nga armas  maoy  napunitan  sa  mga  kapolisan  sa dapit  nga nahitaboan.

Ang kapolisan padayon pa sa  ilang  imbitigasyon  sa  maong  hitabo  ug  sa pagpaniid  sa motibo  sa maong  krimedn  ingon  man  ang  pagtumbok  sa criminal. (BANAT NEWS)