Mag-uuma wa makapanagkot kay gipusil patay

CEBU, Philippines - Wala  makapanagkot  ang usa ka mag-uuma dihang gipusil  patay  kini sa wala  hiilhing  kriminal  didto sa sitio Malapangi, barangay Balao, lungsod sa Barili niadtong Huwebes sa hapon.

Ang biktima nailhan nga si Eutiquiano Zamora, 57, usa ka mag-uuma, nga taga  barangay Pangpang sa maong lungsod.

Sa pakighinabi sa Banat News ni PO3 Heinie Espera, sa Barili Police  Station  nasayran  nga ang biktima mihapit   sa merkado  sa Balao kay adunay paliton nga dad-on niya sa menteryo aron managkot  dihang  kalit  lang  mitungha  ang  wala hiilhing lalaki  ug  sa walay  igong hinungdan  miluthang  sa biktima.

Naigo sa buko-buko ang biktima nga maoy hinungdan sa hinanali niining kamatayon  samtang  mieskapo  usab  dayon ang  kriminal nga walay  nakaila.

Matud  pa ni Espera  nga  padayon nga gipangita karon sa kapolisan ang kriminal  samtang  gituohan nila nga personal  ang  hinungdan  sa maong  pagpamusil.

 (BANAT NEWS)