(Oktubre 14)Sa kasaysayan karon

Pres. Jose P. Laurel

1943— Gitudlong pangulo sa Pilipinas si Dr. Jose P. Laurel sa mga mananakop nga pwersang Hapones human nila mabuntog ang pwersa sa mga Filipino ug Amerkano atol sa World War II. Si Laurel gipanganak niadtong Marso 9, 1891 ug namatay niadtong Nobiyembre 6, 1959. Una pa niining tanan si Laurel nahimong sakop sa 1935 Constitutional Convention ug usa sa gitawag kaniadtong "Seven Wise Men of the Convention", siya maoy mi-sponsor sa Bill of Rights. Nahimo usab siyang Associate Justice sa Korte Suprema niadtong 1936. Nahimong kontrobersiya ang pagkabutang kang Laurel sa mga Hapones isip pangulo sa nasud. Daghan ang mipasangil kaniyang nagluib siya sa iyang nasud, human sa gubat gipasakaan siya og kasong treason apan kini gibabagan ni Presidente Manuel Roxas ug naapil sa gipasaylo pinaagi sa amnestiya. Dihang pangulo pa sa Pilipinas si Laurel diriyot kining mamatay dihang kini gipusil sa mga gerilyang Filipino sa WackWack Golf Country Club apan nasalbar. Una pa siya mamatay niadtong 1959 si Laurel nasabtan ra sa mga Filipino ilabi na niadtong mga misuporta kaniya sa wala pa ang mga Hapon, tungod kay sa iyang termino isip pangulo gipanalipdan niya ang katungod sa mga Filipino gikan sa pag-abuso sa mga Hapon.

Ikaduhang nabakunahan og anti-rabies

1885— Ang kinse anyos nga si Jean Baptiste Jupille grabeng naangol human kini kuniskunisa og paak sa irong buang nga iyaha rang napatay gamit ang iyang mga kamot, kini nahitabo samtang iyang gipanalipdan ang lima ka mga mas batang pastol sa Villers-Farley, France. Tungod sa iyang pinaakan ug sa peligro sa rabies gibakunahan siya sa giekspirementohan pang bakuna kontra rabies ni Dr. Louis Pasteur, si Jupille maoy nahimong ikaduhang tawo nga nahatagan sa maong bakuna. Ang unang nabakunahan sa anti-rabies vaccine ni Pasteur mao si Joseph Meister kapin duha ka bulan na ang milabay una pa mapaaki si Jupille.