CEBU, Philippines - Patay nang nahidangat sa tambalanan ang usa ka byuda human kini dasmagi og traysikol sa iyang paglabang sa karsada aron unta mopalit og painit didto sa Sitio Cantecson barangay Gairan , siyudad sa Bogo kagahapon sa alas 4:30 sa kaadlawon.
Ang biktima mao si Concordia Masong, 65 , byuda ug nagpuyo sa maong lugar.
Samtang ang nakadasmag kaniya mao ang traysikol nga gimaneho ni Rodulfo Metante, 45, minyo, nagpuyo gihapon sa maong lugar ug usa ka drayber sa traysikol.
Si PO1 Florante Desucatan sa Bogo City Police Station mibutyag sa Banat News nga ang biktima paingon unta sa usa ka tindahan nga atbang sa ilang balay aron pagpalit og puto-maya ug sikwati aron ipainit sa iyang pamilya.
Apan sa iyang paglabang sa karsada wala niya mabantayi ang nagbaguros nga traysikol ug tungod kay nakalitan ang driver, wala usab kini makakontrol sa iyang sakyanan hinungdan nga maayong pagkasabak sa biktima nga naglakaw sa karsada. Nalamba sa karsada ang biktima ug gihatud dayon ngadto sa Verallo District Hospital sa siyudad sa Bogo apan didto gideklarar kini nga dead on arrival.
Samtang ang suspetsadong driver mitahan dayon sa iyang kaugalingon ngadto sa kapolisan.
Misaad hinuon kini ngadto sa mga tagtungod sa namatay nga siya’y moabaga sa gasto sa paglubong sa biktima. (WC) (BANAT)