62-anyos nga laborer ang unang mi-file og CoC sa north district

CEBU, Philippines - Usa ka 62-anyos nga laborer maoy labing unang tawo nga miduso sa iyang certificate of candidacy sa buhatan sa Commission on Election (Comelec) sa dakbayan sa Sugbo aron mokandidato pagka-kongresista sa North District.

Ang residente sa barangay Mabolo nga si Juan Arenasa midagan pagka-kongresista sa north district isip independente sa alas-10 sa buntag kagahapon, kini mibutyag nga buot niyang mobubo og daghang proyekto sa bukirong barangay.

Pag-abot sa alas-2 sa hapon miduso usab sa iyang COC isip independente ang 54- anyos nga residente sa Barangay Day-as nga   si Pablo “Junnex” Doronio Jr. kinsa modagan gihapon pagka-kongresista sa north district ug nangangkon kini nga usa ka sakop sa media. Usa usab ka retiradong fiscal nga si Vicente Mañalac maoy ikatulo nga  congressional candidate Cebu City north district. Miduso siya sa iyang CoC pasado alas 3 sa hapon.

Samtang ang election officer sa Cebu City North District nga si Atty. Marchel Sarno misaysay nga naanad na ang ilang buhatan nga gamay lang ang moduso sa ilang CoC sa unang adlaw.

Nagkanayon si Sarno nga kasagaran sa mga politiko nga dunay grupo sama sa Bando Osmeña Pundok Kauswagan ug Team Rama moduso sa ilang CoC sa katapusang adlaw sa filing sa CoC.

Daan nang nangagpas si Sarno nga mga independente kasagaran ang unang motunga sa buhatan sa Comelec sa unang adlaw sa pagduso sa CoC.