Nagsunog sa kaugalingon sa Magellan's Cross namatay

CEBU, Philippines - Ang lalaking gituohang dunay dakong problema nga nagsunog sa iyang kaugalingon sa sulod sa Magellan’s Cross kilid sa Basilica Minore del Sto. Niño niadtong Huwebes sa buntag namatay na niadtong Sabado sa alas 3:40 sa kaadlawon base sa rekord sa information office sa Cebu City Medical Center.

Ang lawas sa 77-anyos nga si Exequiel Geneston gikuha ra usab dayon sa pamilya niini pipila ka oras human gideklarar nga patay na sa doktor ug kini gidala ug gihaya sa panimalay sa pamilya sa Sitio Itom-Yuta, Barangay Lorega-San Miguel, Cebu City.

Ang kamatayon sa biktima gikonpirmar usab sa iyang anak nga si Ana Geneston, 44. “O tinuod pero wala na mi dapat isulti pa kay wala na siya, humana,” matud ni Ana sa pakighinabi sa Banat News.

Apan si Ana nagdumili usab sa paghatag og impormasyon sa hinungdan sa kamatayon sa iyang amahan.Si Dr. Marcerey Gallo, general surgeon sa usa ka pribadong hospital sa Sugbo, nagkanayon nga ang kamatayon sa tawo nagdepende kini sa kagrabehon sa pagkasunog sa lawas niini.

Matud ni Gallo nga kung grabe ang pagkasunog sa lawas sa tawo posibleng mamatay kini tungod sa sepsis o impeksyon. “Latter cause ra na (pagkasunog) dili gyud mao ang immediate cause sa death,” matud niya. Ang sepsis usa ka makamatay nga kondisyon gumikan sa pagkasunog diin dali na mataptan og impeksyon ang lawas. Si Gallo midugang nga posible usab mamatay ang tawo kung nakahanggap siya og grabeng aso o kalayo nga moresulta ngadto sa “multi-organ failure” o ang pagdungan og kapawong sa tanang sistema sa lawas sa tawo sama sa kasingkasing, baga, kidney ug uban pa.

Si Exequiel giingong nakaangkon og third degree burns sa iyang nawong ug lawas ug walay panimuot samtang na-confine sa hospital sukad niadtong Huwebes.  (BANAT NEWS)