Sakop sa Bantay Dagat gipriso kay nag-wara-wara sa iyang armas

CEBU, Philippines - Gibalhug sa karsel ang sakop sa Bantay Dagat human kini dakpa sa kapolisan kay nag-wara-wara, sa iyang armas nga walay lisensiya didto sa barangay Balud sa lungsod sa Dalaguete niadtong Sabado sa buntag.

Ang suspetsado mao si Felipe Inion, 59, minyo, mananagat ug sakop sa Bantay Dagat sa maong lungsod.

Nakuha gikan kaniya ang kalibre .22 magnum nga   adunay lima ka buhing bala.

Si SPO1 Veronico Centino sa Dalaguete Police Station mibutyag sa Banat News   nga milihok dayon sila human madawat ang maong alarma.

Ang mirespondi   mao sila si SPO1 Jose Gino Ursonal ug mga kaubanan ug pag-abot nila sa lugar, ang suspetsado maoy ilang nakit-an nga nagwara- wara sa iyang armas   de fuego nga nakapahadlok sa mga tawo nga diha sa iyang palibot sa maong higayon. Dihang ila kining gisusi, nasuta nga wa siya’y lisensiya sa pagdala niini.

Ila dayon kining gisikop   ug gibalhug sa prisohan ug karong buntag gitakdang pasakaan na kini og kaso   sa korte ang maong suspetsado. (BANAT NEWS)