CEBU, Philippines - Usa ka 32-anyos nga amahan ang gipadakop sa iyang 8-anyos nga anak nga lalaki kinsa giingong iyang gidagmalan niadtong milabay’ng adlaw nga Martes.
Ang maong pagsikop nahitabo niadtong Biyernes sa lungsod sa Alcoy human ang bata misumbong sa social welfare sa ilang lugar sa gibuhat sa iyang amahan ngadto kaniya.
Sila si PO3 Eduardo Santander ug PO2 Marivel Pardo ang misikop sa suspetsado human si Elizabeth Bañares Municipal Social Welfare Officer (MSWO) sa lungsod mianha sa Alcoy Police Station nangayo og tabang.
Sa imbestigasyon ni PO3 Junalyn Entrina sa Women and Children Protection Desk nasuta nga ang bata giingong gibun-og sa iyang amahan.
Ang bata kinsa nakuhaan og hulagway sa iyang mga bun-og mitumbok sa iyang amahan nga maoy mikulata kaniya. Si Pardo nga nahinabi sa Banat News mibutyag nga nakadawat sila og report nga hubog niadtong higayona ang suspetsado dihang gibun-og ang bata. (BANAT NEWS)