Pag-renew sa rehistro sa PUV ipasayo

CEBU, Philippines - Maihap nalang ang mga adlaw sa mga sakyanang wala magsubay sa mga rota ug sa mga kolurom tungod sa ipatumang proyekto sa franchising board ug transport office.

Ang Land Transportation Franchising and Regulatory Board-7 miawhag sa mga transport operators nga ipasusi una o ipakompirmar ngadto sa ilang ahensya ang ilang mga sakyanan duha ka semana una pa mo-expire ang rehistro sa ilang sakyanan aron malikay sa pagkadelatar.

“Dapat magpa-confirm na sila sa LTFRB two weeks before mo-expire ang ilang rehistro sa sakyanan para dili na sila malangay,” matud pa ni LTFRB-7 regional director Ahmed Cuizon.

Niadtong Septiyembre 3, 2012 kining “Interconnectivity” project sa LTFRB ug LTO gisugdan nga ang tuyo mao nga kinahanglang magdungan gyud ang kompirmasyon (diha sa LTFRB) ug rehistro (diha sa (LTO) sa mga public utility vehicles (PUV) o mga pasaheroan. Kini gituyo aron mahibaw-an ug mahunong na kining mga pasaheroang mga kolurom sa mga operators. Pinaagi niining proyektong interconnectivity maputol na ang mga adlaw niining mga kolurom nga mga pasaheroan.

“Dili na gyud na makalusot na ang mga colorum ug out-of-line vehicles,” matud pang Cuizon.

Samtang si LTO-7 regional director Raul Aguilos miingon nga kadtong mga nanag-iya og mga sakyanan nga dili makaparehistro og balik sa ilang mga sakyanan pamultahon og 150 porsiyento base sa kung pilay iyang gibayad sa katapusan niining pagparehistro.

Si Cuizon midugang nga daghang mga operators ang nangreklamo sa maong proyekto tungod kay nasamot daw og kalangay ang ilang pagpa-renew sa rehistrasyon sa ilang mga sakyanan.

Ilabi na niadtong mga operators nga mopa-renew sa ilang rehistrasyon usa ka adlaw o sa mismong nga mapupos ang expiry date sa ilang rehistro. Hinuon gipasabot ni Cuizon nga ang kalangay bunga sa kahinay sa koneksyon sa internet sa duha ka ahensya.

“Kay adto na man lang tan-awon sa LTFRB ug LTO database ang mga records. This is a paperless transaction. So, kung hinay ang internet connection, chances are malangay sad ang transaction,” sumala pang Cuizon. (BANAT NEWS)