Pito ka balay ug multicab nasunog

CEBU, Philippines - Pito ka mga balay ug usa ka multicab ug usa ka motorsiklo ang gilamoy sa duha ka hugnang sunog nga miangol usab sa usa ka tawo niadtong miaging adlaw sa dakbayan sa Lapulapu.

Si SFO1 Agapito Bolotano sa Bureau of Fire Protection (BFP) sa maong dakbayan nga nahinabi sa Banat News miingon nga ang unang sunog nga ilang gitubag nahitabo ala 1:38 ang takna sa hapon sa barangay Buaya nga nakontrolar sulod sa 8-minutos.

Upat ka mga balay ang nasunog nga ginama sa mix materials nga gipanag-iya nila ni Casiano Panuan, Rosendo Panuan, Ressell Cuizon ug Emelia del Castillo.

Naangol usab sa maong hitabo si Casiano Panuan Jr., 29 anyos kinsa nakabaton og 1st degree burn sa iyang kalawasan dihang ang pkalayo kalit lang misilaob sa iyang lawak sa ikaduhang andana sa ilang balay. Si Panuan gidala sa tambalanan.

Matud pa ni Bolotano nga gidudahan nilang electrical short circuit ang hinungdan niini, daling nakatawag sa bombero si Panuan, gibanabanang mokabat P30,000 ang gibilin nga danyos sa maong sunod sanglit wala hingpit mangaugdaw ang upat ka balay.

Ang ikaduhang sunog nahitabo alas 7:05 ang takna sa hapon sa maong adlaw sa sitio Mustang barangay Pusok sa maong dakbayan nga ilang nakontrol sulod sa 13- minutos.

Ang tulo ka panimalay nga gipanag-iya nila ni Loreto Berezo, Emila Berezo ug Emilio Berezo ug lakip usab sa gipanag-iya ni Emilio ang multicab ug usa ka motorsiklo nga nasunog.

Matud pa ni Bolotano usa ka Bryan Berezo ang mitug-an kanilang nagsugod ang kalayo diha sa ilang kisame dihang ang chargeable nga bombilya kalit lang miboto.

Gibanabanang mokabat sa P130,000 ang gibilin nga danyos sa maong sunog nga nahitabo. (BANAT NEWS)