CEBU, Philippines - Mipahimangno ang mga tinugyanan sa lakat sa panahon sa mga residente ug mga mananagat nga maglikay una sa kadagatan tungod sa super typhoon Karen (Sanba) nga pabilin ang gikusgon samtang kini nagdagan padulong sa amihanan sa East Philippine Sea kagahapon.
Ang Philippine Atmospheric Geophysical and Astronomical Service Administration (PAGASA) sa report sa GMA News Online, si Karen gibanabanang anaa sa 740 km sa silangang bahin sa Aparri, Cagayan alas-10 sa buntag kagahapon nga may maximum sustained winds nga 185 kph duol sa mata niini ug may huros sa hanging 220kph.
Ang karon gikonsiderar sa mga eksperto nga usa ka talagsaong annular typhoon tungod kay ang korte sa mata niini parehas og porma ug wala mag-usab usab nga nagpasabot nga kusog kaayo kini ug wala maapektahi sa ubang kondisyon sa gawas sa palibot niini. Ang mga annular typhoon gikatahong magkadugay magkakusog ug mas dugay molurang itandi sa ubang bagyo.
Hinuon bisan pa man sa gikusgon ni Karen walay giisang storm warning signals sa bisan asang parte sa Pilipinas. Gipaabot nga motugpa si Karen sa Taiwan karong buntaga (Sabado).
Bisan walay storm warning signal sa Pilipinas mipasidaan ang PAGASA birahon ni Karen ang habagat ug magdala og hinay ngadto sa kasarangang pag-ulan sa Metro Manila apan panalagsang kusog nga pagbunok sa ulan sa pipila ka bahin sa Luzon ug Western Visayas.
Gidid-an usab ang mga gagmay’ng panagatan nga makapalawod ilabi na sa silangang bahin sa nasud tungod sa hanging dala ni Karen. Ang mga awtoridad sa katalagman nangandam na sa posibleng epekto ni Karen. (/EIM)(BANAT NEWS)