Silot sa polis nga mipatay'g 2 babaye gipaubsan sa CA

CEBU, Philippines - Gipalig-on sa Court of Appeals ang nahaunang desisyon sa lower court sa pagkombikto ni kanhi SPO1 Mateo Yanson tungod sa pagpatay sa duha ka mga babaye niadtong tuig 2006 nga ang usa tigpautang sa mga polis ug ang usa sekretarya sa naulahi.

Si Associate Justice Gabriel Ingles nagkanayon nga sakto ra ang pagkombikto apan dili sa kasong murder kundi homicide tungod kay wala maestablisar sa prosekusyon nga aduna gyuy treachery sa habig ni Yanson. Gipaubsan ni Ingles ang sentensya ni Yanson gikan sa 40 ngadto 80 ka tuig nga pagkapriso sa duha ka kaso ngadto na lang sa 20 ngadto sa 34 ka tuig.

Kahinumduman nga si Yanson gikombikto sa kasong murder sa pagpatay nila ni Pilar Hernandez, 61, ug Wivina Pancho, 55, niadtong Septiyembre 9, 2006 sa alas 8:30 a.m. sa sulod sa PHR Lending Company nga gipanag-iya ni Hernandez diha sa dalan M.J. Cuenco ning siyudad. Base sa testimonya sa prosekusyon ilang nakit-an si Yanson padulong sa opisina ni Hernandez nga nagsul-ob og t-shirt nga naay markang polis, camouflage shorts, sapatos ug ID.

Pagkahuman niini migawas kini ug milakaw sakay sa multicab padulong sa pier area.

Base sa testimonya sa depensa walay igong basehan ang testimonya sa prosekusyon tungod kay wala makapresentar ang prosekusyon og direct evidence ug eye witness nga magpamatuod nga si Yanson ang mihimo sa krimen ug wala usab makasuportang ebidensya sa motibo. Sumala pang Yanson sayop ang pagsilot kaniya og reclusion perpetua nga gibase lang sa “circumstantial evidence” ug wala hatagi og bili sa korte ang iyang depensa.

Apan si Ingles nagkanayon nga wala sila mokombinsir sa argumento ni Yanson ug duna gyud silay nakitang basehan nga tuohang si Yanson gyud ang mihimo sa krimen.

Matud pang Ingles dili tanang higayon nga direct testimony ang gikinahanglan aron mapamatud-ang sad-an ang usa ka akusado. (BANAT NEWS)