Cuenco di na mokandidato sa 2013

CEBU, Philippines - Wala pa gani mobagting ang bagtingan sa bugnong lugaynon, misibog na si kanhi kongresista Antonio Cuenco ug dili na modayon pagpapili sa pagka kongresista sa south district sa dakbayan sa Sugbo ubos sa Team Rama.

Gikatahong ang balatian sa lawas maoy rason ni Cuenco nga gitawag og “vertigo” maoy rason nga mosibog siya sa iyang tinguhang modagan pagka kongresista diha sa Cebu City south district.

Si Cuenco nga 77-anyos na maoy usa sa lig-ong kandidato nga ikaatbang unta ni Konsehal Rodrigo “Bebot” Abellanosa nga maoy kandidato sa Bando Osmeña Pundok-Kauswagan (BOPK).

Gisugyot ni Cuenco ngadto ni Mayor Michael Rama nga ang ipuli kaniya mao si Konsehal Jose Daluz III nga karon usa sa mga konsehal sa dakbayan nga alalay sa Team Rama.

Apan si Daluz mipasabot nga bisan og andam siya nga modawat sa hagit, apan kunsoltahon niya ang iyang pamilya ug mga kauban.

Si Rama wala pa makuhai og pamahayag sa labing ulahi nga kalamboan sa politika sa iyang grupo kay atoa pa kini sa China ug unya pa sa Martes nga mopauli dinhi sa dakbayan.

Apan si Kongresista Tomas Osmeña nga maoy pangulo sa BOPK namahayag nga dugay ra sila nga nagtoong mosibog ra si Cuenco sa iyang kandidatura.

Gihandom ni Osmeña nga niadtong nagkaatbang sila si Cuenco ug magpapatigayong Jonathan “Atan” Guardo miaksyon na og sibog si Cuenco tungod sa kabalakang mapildi ug giingong nagpatudlo pa kining ibutang isip ambassador sa Pilipinas didto sa laing nasud.

Si Abellanosa igo lang mipahiyom sa labing ulahi nga kalamboan sa politika. Si Abellanosa maoy numero uno nga konsehal sa dakbayan sa Sugbo kay siya maoy labing daku og nakuha nga botos sa tanang mga konsehal.

Ang anak ni Cuenco nga si James maoy mibasa sa suwat sa iyang amahan nga gipadala kang Mayor Rama didto sa City Hall. Gisaysay ni James nga ang ilang doktor nga si Manuel Lim mitambag gyud sa iyang amahan nga dili kaayo maghago sa iyang lawas aron dili mosamot ang iyang sakit.

Ang makasinati og vertigo makabatyag nga ang tanang mga butang sa iyang palibut molihok ug siya malipong kun mosuol kini.

Matud ni James nga kapoy kaayo ang politika karon sa dakbayan sa Sugbo nga sa buntag mohimo sila og pagpanglamano sa katawhan ug ini’g gabii, motambong na usab og pulong-pulong sa lainlaing barangay.

Sa usa ka interbyu sa Banat News, si Cuenco miingon nga nahadlok kini kun kining maong sitwasyon magpadayon nga layo pa ang eleksyon, tingali dunay mga kandidato nga mamatay sa kakapoy.

Sa laing bahin, si Annabelle Rama nga ig-agaw ni Mayor Rama paspas na usab sa iyang pagpangampanya sa tinguha niya nga modagan pagka kongresista sa north district.

Hangtud karon wala pa mopahibalo ang BOPK kun magpasubli ba si Kongresista Rachel Cutie Del Mar o kaha mobalik sa pagpapili ang iyang amahan nga si kanhi kongresista Raul Del Mar. (BANAT NEWS)