RH Bill gilangaylangay-Sen. Cayetano

CEBU, Philippines - Gikasagmuyo ni Senador Pia Cayetano ang gihulagway niyang iresponsable ug usa ka ‘delaying tactic’ ang posibleng pag-oktaba sa deliberasyon bahin sa kontrobersyal nga Reproductive Health (RH) bill diha sa Senado.

Matud pa ni Cayetano katungod sa publiko nga makabaton og ‘naglihok’ nga Senado ug ang paglangaylangay sa botasyon kabahin niini usa ka iresponsableng lakang ug klarong taktika lamang.Si Cayetano kinsa usa sa mga nagsulat sa maong bill mipadayag niini human si Senate President Juan Ponce Enrile sa usa ka radio interview niadtong Domingo nagkanayon nga tungod sa mga congressional breaks ug sa umaabot nga eleksyon isibog na lang ngadto sa Hunyo sa sunod tuig ang deliberasyon sa RH Bill. 

Atol sa deliberasyon buhaton usab ang mga kausaban ug isunod dayon ang “Turno En Contra” ni Senate Majority Leader Vicente Sotto III batok sa RH bill nga gikatakda unta ugmang adlawa (Miyerkules) sumala pa sa report sa GMA News Online.

Buot ni Enrile nga wagtangon ang provision nga nagdeklarar sa contraceptives isip essential medicine.“You know, pinakamaselan at pinakadelikadong bill ngayon ang RH bill na pumasok sa buhay ng bansang ito. You will control the size of our population because the bill itself is a population control bill,” matud pa ni Enrile.

Apan si Cayetano kinsa maoy chairman sa Senate committee on health and demography miingon nga pipila lang ka mga sesyon ang kinahanglan alang sa period of amendments. Gihulagway niyang kinaraang taktika sa politika ang gihimo aron langaylangayon ang maong bill.(Gikan sa Wires/EIM) BANAT NEWS