CEBU, Philippines – Usa ka balay nga nahimutang diha sa Cebu South Coastal Road habig sa barangay San Roque, dakbayan sa Talisay ang naguba human kini daruha sa usa ka Toyota Fortuner nga nagtangag sa plakang YFP-148 kagahapon sa alas 7:30 sa buntag.
Ang drayber sa maong sakyanan nga si Phel Charlie Luaña, taga Sea View Heights sa barangay Lawaan I, dakbayan sa Talisay daling gidala ngadto sa Chong Hua Hospital tungod sa pagkaangol niini sa maong aksidente.
Hinuon walay gikatahong mga naangol diha sulod sa balay nga gipanag-iya ni Bernie Paclepan hingkod ang panuigon.
Si PO1 Robert Sabiquel sa pakighinabi niini sa Banat News kagahapon nagkanayon nga base sa imbestigasyon ni PO1 Rosauro Pasumala, si Luaña gikan sa dakbayan sa Sugbo apan pag-abot sa nahitaboan kalit misaka sa gutter ang sakyanan.
Gipasangil nga dangog ang dalan tungod sa pagbundak sa uwan maong nawad-an og kontrol sa manobela si Luaña ug nalahos sa balay ni Paclepan.
Sa laing bahin, naangol ang usa ka drayber sa motorsiklo human kini mabag-iri sa 10 wheeler cargo truck kagahapon sa mga alas 9:45 sa buntag diha sa CSCR habig sa barangay San Isidro.
Daling gidala ngadto sa Talisay City District Hospital si Floridel Bascon, taga barangay Dumlog sa maong dakbayan tungod sa mga pangos ug bun-og.
Ang drayber sa Fuso drop side truck nga si Jose Almer Miranda, 34, taga barangay Lutac, dakbayan sa Naga gipasanginlang nag-“beating the light” maong naigo niini si Bascon. (EIM) BANAT NEWS