14-anyos mipalusot og marijuana sa MCJ

CEBU, Philippines - Usa ka 14-anyos nga batang lalaki ang gisikop sa mga jailguards sa Mandaue City Jail human kini siya maaktuhing buot untang mopayuhot og mga sticks sa marijuana kagahapon sa hapon.

Si Glenn (di niya tinuod nga pangan), residente sa barangay Looc, dakbayan sa Mandaue ang gisikop ni JO1 Marcelino Abucay nga anaa madestino sa “visitor’s inspection section.”

Gidakop siya tungod sa nakit-ang 36 ka linikit nga marijuana sulod sa maong prisohan.

Nasayran matud pa nga ang maong mga linikit nga marijuana gisulod sa putos sa biscuit kauban sa uban pang mga biskwit ug sabon panlaba nga alang unta sa usa ka inmate diha sulod sa prisohan.

Apan atol sa inspeksyon natingala si Abucay kun nganong adunay gamay nga buslot ang maong putos ug naaghat siya sa pagbukas niini ug maoy iyang nakit-an ang 36 ka linikit sa marijuana.

Ang bata mitug-an nga gisugo lamang kini sa usa ka Joy Gestopa nga ilang silingan sa sitio Superior nga itunol ang “pack” ngadto sa usa ka Edward Baguio, usa sa mga inmate sa prisohan.

Ang menor de edad nagkanayon nga gisuholan siya og P13 aron ihatud kini sa maong prisohan.

Tungod sa maong impormasyon gipahibalo sa MCJ ang Mandaue City Police Office sa tinguhang madakpan si Gestopa.

Ang menor de edad gi-turnover na ngadto sa City Social Welfare Services niadtong Miyerkules sa gabii samtang ang kapolisan sa dakbayan ang mipahigayon og buybust operation sa silingan sa maong bata nga si Joy Gestopa apan nakaikyas kini.

Nadakpan hinuon ang kauban ni Gestopa nga si Raul Sangcap,28, kinsa mitunol og napulo ka linikit nga marijuana sa poseur buyer. ( /EIM)   - BANAT NEWS