2 mipatay sa driver sa habal-habal sikop

CEBU, Philippines - Duha ka suspek sa pagpusil patay sa usa ka drayber sa habal-habal didto sa Tabunok dakbayan sa Talisay nadakpan didto sa usa ka motel sa barangay Mabolo, dakbayan sa Sugbo, niadtong Martes sa buntag.

Ang mga nasikop mao sila si John Kevin Villaver alyas “JK”, 24, ug Mark Joseph Balaga, 26, pulos taga barangay Poblacion ,Talisay.

Ang duha maoy suspetsado sa pagpusil patay kang Kevin Cabañero alyas “Teban” niadtong Domingo sa kaadlawon sa ilawom sa flyover sa Tabunok. Si Supt. Eddie Recamara sa pakighinabi niini sa Banat News nagkanayon nga gipareglahan lang sa duha ang biktima tungod kay nakita nila kining kabarkada sa ilang kaaway nga taga Tabunok.

Gibutyag ni Recamara nga adunay usa ka barkada sa mga suspetsado nga maoy nakig-alayon kanila hinungdan nga nadumdoman nila ang nahimutangan sa duha.

Matud sa hepe nga ang duha naghuwat sulod sa usa ka tawong ilang gihuwaman og kwarta nga gamiton nila sa pag-ikyas.

Apan wala kini makaikyas dihang wala nila dahoma ang pag-abot sa mga polis. ( WC) BANAT NEWS