CEBU, Philippines - Gipalabang kagahapon sa buntag ni Bise Mayor Alan Bucao atol sa regular session sa konseho sa Talisay ang duha ka resolusyon sa pagpahasubo sa pamilya ni Capt. Jessup Bahinting ug kang Department of Interior and Local Government (DILG) Secretary Jesse Robredo.
Si Bucao nagkanayon nga si Bahinting usa ka residente sa dakbayan sa Talisay ug chairman ug Chief Executive Officer (CEO) sa Aviatour Air kinsa miluwas sa kinabuhi sa zoo keeper nga si Ronaldo Aventurado nga napaakan sa kobra niadtong Agosto 14, 2012.
Si Bahinting mipagamit sa iyang eroplano aron makuha ang anti-venom gikan sa Camiguin nga maoy gitambal kang Aventurado.
Apan gawas niini si Bahinting ang kanunay’ng mitabang sa mga relief work ngadto sa mga dapit nga nahiagom sa mga katalagman sa nasud.
Gani mitabang usab si Bahinting sa mga nabiktima sa landslide sa Guinsaugon kaniadto lakip na mga nabiktima sa susamang katalagman didto sa Negros Oriental, Marikina, Iligan City ug Cagayan de Oro City nga gikusokuso sa bagyong Sendong.
Ang tipik sa resolusyon ni Bucao nagkanayon nga si Bahinting aktibo usab kaayo sa mga kalihokan sa simbahan isip Pastor kinsa migamit sa iyang hiantigohan sa pagmaneho sa iyang abyon sa paghatud sa mga hinabang ngadto sa mga dapit nga angay tabangan busa tinuod gayud nga usa siya ka manggiluy-on ug matinabangong tawo
Busa miduyog ang katawhan sa Talisay ilabi na ang mga pamunoan sa maong dakbayan sa kasub-anan sa hinanaling kamatayon ni Bahinting niadtong Agosto 18, 2012.
Siya ang abyador sa kaugalingon niyang eroplano nga Piper Seneca nga giluwanan usab ni DILG Secretary Jesse M. Robredo dihang nahagsa kini sa kadagatan sa lalawigan sa Masbate .
Ang maong hitabo nagdulot og dili hitupngang kasubo sa mga taga Sugbo ug sa tibuok nasud, tipik sa maong resolusyon.
Sa laing bahin, si Bucao nagkanayon nga si Robredo lahi sa ubang mga kalihim sa DILG kay mao kini ang kanunay nga manawag kaniya ug nagpahinumdom bahin sa pagpalig-on ug pagpatumang hingpit sa local government code ilabi na ang bahin sa good governance, housekeeping ug transparency.
Samtang si Antonio Juredini, ang director sa flight school sa Aviatour mipamatuod nga si Bahinting gayud maoy abyador sa nahagsa nga abyon sukwahi sa mga nahaunang estorya.
Sa balita kagahapon sa TV Patrol Central Visayas sa ABS-CBN nasayran nga ang pamilya ni Kshitiz Chand natahap nga si Chand nga maoy co-pilot ni Bahinting sa maong higayon maoy nag-abyador sa gidimalas nga abyon.
Mitumaw ang maong pagduda tungod kay si Bahinting didto sa tuo nga lingkoranan maglingkod dihang giugkat kini sa mga rescuer gikan sa sulod sa abyon nga natundag sa ilawom sa dagat.
Gipasabot ni Juredini nga naingon niadto ang kahimtang tungod naghayang na ang abyon busa imbis sa walang lingkoranan si Bahinting maglingkod didto na kini sa tuo tungod kay nabalista man ang abyon. ( WC) - BANAT NEWS