Nagmaoy giluba patay

CEBU, Philippines - Patay ang usa ka lalaking hubog kinsa giingong nagmaoy human kini dunggaba sa wala hiilhing kostumer sa usa ka imnanan sa barangay Tabunok, dakbayan sa Talisay kagahapon sa kaadlawon.

Ang biktima mao si Carlito Hermosa, 25, taga sitio Pang-pang, barangay San Isidro, sa maong dakbayan kinsa nasabak sa tiyan.

Sila si SPO4 Daniel Tarucan, PO3 Benedicto Lasque ug PO3 Ferdinand Pablo kinsa maoy miresponde sa maong alarma mibutyag sa Banat News nga si Hermosa uban sa iyang mga higala nga sila si Joseph Guanlo ug Arnel Montecillo, pulos hingkod ug managsilingan sa Pang-pang nag-inom usa ka imnanan sa sitio Nonoc, Tabunok. Sa dihang nangalasbag na ang tulo, misugod na og hiwasa si Hermosa ug nagsaba-saba sa sulod sa imnanan hinungdan nga gibadlong kini sa gwardiya lima ka higayon.

Si Guanlo giingong migawas sa imnanan ug mipaandar sa Jiffy nga ilang gisakyan.Apan tungod sa pagpunay og rebolusyon niini sa makina sa maong sakyanan, misamot ang kasaba sa imnanan hinungdan nga nangasuko ang ubang mga kostumer.

Ang gikasuk-an sa mga nanag-inom gawas sa kasaba sa makina sa sakyanan puwerti pa gyung itoma og aso sa tambutso niini.

Unya usa sa mga customer miduol ug mibadlong kang Guanlo apan nasuko ang naulahi ug diriyot sila magkasinumbagay maayo nalang kay giuwang sila sa gwardiya.

Apan samtang gihusay si Guanlo ug ang usa ka customer nga wala hiilhi, may laing tawo nga miduol kang Hermosa ug gihansakan kini sa tiyan sa iyang kutsilyo.

Dihang nahagba na si Hermosa sa yuta, giduol na usab sa maong kriminal si Guanlo ug gihansakan na usab kini sa iyang kutsilyo.

Apan gumikan sa kaabtik ni Guanlo nakalihay   kini ug wala maigo. Dihang nagkaguliyang na ang mga nanag-inom, dali kaayong nakasibat ang kriminal pahilayo gikan sa maong lugar nga walay nakabutyag sa iyang ngalan.  (/WC) (BANAT NEWS)