Sulod-gawas sa prisohan gipatay sa nanulong

CEBU, Philippines - Gisulong sa balay ug gitabangan og pusil patay ang 35-anyos nga lalaking giingong nagsulod ug gawas na lang sa prisohan sa gawas sa pinuy-anan niini sa barangay Baliwagan, lungsod sa Balamban ala 1:00 sa sayong kaadlawon kagahapon.

Ang biktima nga naputos sa samad pinusilan mao si Eduardo Arante Georpo, 35, nagpuyo sa maong lugar. Samtang duha ka mga lalaking wala pa makuha ang pangalan maoy gitumbok nga responsable sa krimen.

Matud ni SPO1 Julius Obanana, desk officer sa Balamban Police Station dihang nahinabi sa Banat News migawas nianang kaadlawon sa balay ang biktima apan kalit nga miabot ang duha ka lalaki ug gitabangan kini og pusil.

Nagbuy-od na ang biktima sa yuta dihang naabtan sa mga polis ug nabulit ang kalawasan niini og samad pinusilan.

Walo ka basiyo sa kalibre .45 nga bala ang nakuha sa kapolisan diha sa crime scene.

Matud ni Obanana ang biktima nagsud ug gawas na lang kini sa bilanggoan tungod sa lain laing kaso sama sa pagbugoy bugoy, pagpamaregla ug kawat, ang biktima naputos usab og daghang mga patik ang kalawasan niini ug gihulagway sab nga daghan og mga kontra.

Gitutokan sa imbestigasyon nga posibleng personal nga atraso ang motibo sa krimen. ( /EIM) - BANAT NEWS