Pamilyang Bahinting nakadawat na sa nahitabo

CEBU, Philippines - Kalmadong gidawat sa kapikas ni Capt. Jessup Bahinting nga si Margarita Bahinting kung unsa may dangatan sa iyang bana human mogawas ang balitang napalgan na ang patay’ng lawas ni Department of Interior and Local Government (DILG) Secretary Jesse Robredo ug dunay nahabilin pang patay’ng lawas o mga patay’ng lawas sa lawas sa nahagsang abyon sa kadagatan sa Masbate City.

Una pa niini ang Banat News mianha kagahapon sayo sa buntag sa balay sa pamilyang Bahinting diha sa sitio Uldog, barangay San Isidro, dakbayan sa Talisay ug gikahinabi si Margarita.

“We are longing for his return that his body will be recovered…., I am still hoping because there is nothing impossible with God,” matud ni Margarita.

Pasado alas-8 sa buntag kagahapon ang patay’ng lawas ni Robredo nahaw-as na gikan sa dagat nga may gilawmong 180 ka tiil. Matud pa gawas pa kang Robredo duna pay patay’ng lawas nga nakit-an sa ilawom apan naglisod pagkuha ang mga divers tungod kay naugbok og maayo ang abyon sa ilawom.

Atol ning pagsulat sa balita gitinguha pa sa divers nga makuha ang patay’ng lawas nga gituohang ila ni Bahinting ug sa Nepalese co-pilot niini nga si Kshitiz Chand.

Ang lawas ni Robredo maoy unang nakuha ug gidala na ngadto sa ilang lugar sa Naga City inubanan ni Presidente Benigno Aquino III ug mga sakop sa gabinete niini.

Si Margarita kinsa nagpanuigon og 64-anyos, kalmante kaayong nakighinabi sa mga tigbalita nagkanayon kini nga ang mga pag-ampo sa ilang pamilya ug kaigsuonan sa simbahan ang naghatag kaniya og kusog ug kakalma sa pagdawat sa hitabo.

Sa balay sa mga Bahinting daghan nang mga kabanay ug kahigalaan ang naghugop aron pagsuporta sa pagbangutan sa pamilya, duna say Santos nga Misa sa Sacred Heart Parish sa dakbayan sa Sugbu pahinungod sa mga biktima.

Ang pamilyang Bahinting dunay duha ka anak nga lalaki ug usa ka babaye nga pulos mga piloto ug nagpadagan og kaugalingon nilang flying schools sa Estados Unidos ug sa Dumaguete City.

Si Bahinting nga nagpanuigon og 60-anyos magsaulog unta sa iyang ika-61-anyos nga birthday karong Nobiyembre 30, 2012. Siya maoy Area Superintendent of the Visayas sa ilang religious group nga Grace Communion International ug miyembro usab sa Board of Council.

Nagsugod og pagpalupad og abyon si Bahinting sa dihang nag-edad pa kini og 22-anyos ug dunay higayon nga kuyogon niini si Margarita.

Matud pang Margarita si Bahinting gyud maoy gi-request ni Robredo nga mopiloto sa abyon pabalik sa Naga City, si Chand graduating na unta sa pagka-piloto ug makadaghan nang nakakuyog sa mga flights sa ubang piloto aron mag-obserba. (Brenda D. Batuto/EIM) (BANAT)