Robredo ug 2 piloto pabiling missing

CEBU, Philippines - Nagkaproblema ang mga rescue divers nga nangita sa gisakyang Piper Seneca ni interior secretary Jesse Robredo kinsa pabiling missing lakip na ang pilotong si Capt. Jessup Bahinting ug ang Nepalese co-pilot niining si Kshitiz Chand tungod sa gilawmon sa dagat sa gihagsaan niini.

Si Presidente Benigno Aquino III miadto na sa crash site ug tibuok adlaw kagahapon nga nagbantay sa kalamboan sa search and rescue operation uban sa mga opisyales sa militar ug kapolisan.

Miabag na usab ang U.S. Navy pinaagi sa pagdala sa ilang kaugalingong search and rescue team ug abyon aron motabang sa kapin 300 ka mga rescuers nga misiksik sa kadagatan.

Ang tumoy lang sa tuo nga pako sa maong abyon ang nakit-an sa dagat matud pang Defense Secretary Voltaire Gazmin sa The Associated Press.

Bugtong nakagawas sa nahagsang abyon ang aide-de camp ni Robredo nga si Senior Insp. Jun Abrazado kinsa nakuyapan og kadiyot ug nakamata dihang miabot na sa iyang dughan ang tubig.

Matud pa ni Sec. Mar Roxas nga bisan sa kapeligro na sa sitwasyon nagakos pa ni Abrazado si Robredo ug gisigurong naka-seat belt ang kalihim. Duna nay gipadalang sonar nga maka-detect og metal sa ilawom sa tubig sa crash site. Kagahapon nakit-an ang flight plan ni Bahinting ilawom sa 150 ka tiil nga dagat, gilaoman nga pinaagi niini masubay nila ang gikahimutangan sa abyon.

Sa report sa GMA News.Online, si Roxas mipadayag sa kalisod ug peligrong nasinati sa mga divers nga misalom og 131 feet ngadto sa 285 feet tungod sa posibilidad nga sila maoy makalas tungod sa nitrogen narcosis nga epekto sa pagsalom lapas sa 40 meters (131 feet).

Ang nitrogen narcosis mao ang bation sa divers nga sama sa nahubog sa bino ug mahimo nang pabaya alang sa ilang kaluwasan samtang naglangoy sa ilawom. (BANAT NEWS)