Nanagpa sa MMDA enforcer hayan kuhaa'g lisensya

CEBU, Philippines - Hayan matangtangan og lisensya sa pagmaneho sa tibuok kinabuhi ang motoristang nakuhaan og video nga misagpa sa usa ka traffic enforcer sa Metropolitan Manila Development Authority sa Quezon City niadtong Agosto 11.

Si Metro Manila Land Transportation Office head Teofilo Guadiz III mihimo na og imbestigasyon sa maong kaso ug sutaon nila kung dunay basehan nga huboan sa iyang lisensya pagmaneho si Robert Blair Carabuena.

Sumala pa sa report sa GMA News.Tv, si Carabuena usa ka executive sa usa ka kompanya sa pabrika sa sigarilyo. Duna   nay pasiunang 60 ka adlaw nga suspensyon sa lisensya niini sumala pa sa report usab sa dzBB.

Si Carabuena ug igsuong si Robert Benjamin gipasakaan og kasong direct assault sa MMDA.

Si Carabuena nakuhaan og video nga nangasaba sa enforcer nga si Saturnino Fabros dihang gipara kini sa naulahi tungod sa kalapasan sa lagda sa trapiko.

Apan gawas sa pagpangasaba nakuha sa footage nga gisagpa kini ni Carabuena ug gikuptan ni Robert Benjamin si Fabros aron dili makasukol, diha sa footage nakitang walay gihimo si Fabros sa pag-abuso kaniya sa duha.

Si MMDA Chairman Francis Tolentino nagtinguhang ma-promote si Fabros ug miawhag sa LTO nga i- revoke ang driver’s license ni Carabuena.( EIM) - BANAT NEWS