Motorsiklo vs bus usa patay

CEBU, Philippines - Patay ang 28-anyos nga ulitawo human gibanggaan sa kasugat nga Ceres bus ang iyang gimanehong motorsiklo sa San Vicente St ,. Poblacion Uno sa siyudad sa Carcar kagahapon sa alas 3:30 sa kaadlawon.

Ang biktima mao si Wanillo Wamilda, 28, nagpuyo sa sitio Luwanluwan Poblacion Uno sakop sa maong siyudad.

Samtang ang drayber sa bus nga dunay plaka nga GXS-668 mao si Jose Dadles, 36, taga barangay Mantalongon lungsod sa Dalaguete.

Matud ni SPO1 Eduardo Bagtol sa Dalaguete Police Station nga nahinabi sa Banat News paingon sa merkado sa Carcar ang biktima ug kasugat ang maong bus nga paingon sa Barili.

Pag -abot sa maong lugar nga kurbadahun og gamay ang dalan gikatahong mikawat sa pikas linya ang bus ug napunggit ang biktima kinsa nalabay ug nabuwag sa iyang motorsiklo.

Daling gitabang sa mga tawo si Wamilda ug gihatud sa Carcar City District Hospital apan dangtan og pipila ka gutlo namatay kini tungod sa kadaot nga nahiaguman sa iyang ulo.

Boluntaryo usab nga mitahan sa kapulisan si Dadles samtang nagpaabot sa tukmang sumbong nga ipasaka batuk niya.    - BANAT NEWS