CEBU, Philippines - Gisuportahan ni Mayor Michael Rama ang tinguha sa konseho kalabot sa pag-ban na sa mga plastic bags dinhi sa siyudad sa Sugbo tungod sa kadako sa ikatampo niini sa kalikopan.
Gisugyot hinuon ni Rama nga anamon lang ang pagpatuman niini aron maedukar ang publiko sama sa pagpatuman og mga adlaw nga dili plastic bags ang gamiton sa mga tindahan hangtud nga maanad na ang tawo ug hingpit na gyung ma-ban ang plastic bags.
Ang plastic bags ug uban pang mga basurang ginama sa plastic maoy sagad makabara sa mga kanal sa siyudad hinungdan sa pagbaha panahon sa ting-ulan.
Matud pa ni Rama kinahanglang makat-on ang publiko nga makakita og alternatibo sa gigamit nga styrofoam, disposable nga baso ug plastic nga plato.
Ang nangamahan niining ordinansahon mao si Konsehal Edgardo Labella kinsa miangkong dako og papel ang publiko aron mapatuman kini ug misugyot nga mas maayong magdala ang mangompra og kaugalingong basket sa merkado, ug ang pagdili na sa mga tindahan sa paggamit og plastic bags. (Sanden J. Anadia/EIM) (BANAT)