Bag-ong natawo nga bata gibilin sa tindahan

CEBU, Philippines - Usa ka bag-ong natawo nga bata ang napalgan sa sulod sa usa ka tindahan sa load sa dalan Fatima corner C. Padilla ning dakbayan sa Sugbo sa miaging gabii.

Usa ka ginganlan og JR Generalao uban sa iyang mga barkada naglakaw sa maong dapit   dihang nakadungog sila og hilak sa bata ug dihang ilang gisusi, maoy ilang nakita ang usa ka batang lalaki nga giputos og lampin nga gibutang sa ilawom nga bahin sa loading station.

Ila kining gidala ngadto   sa barangay hall sa Fatima   ug ang Gender and Development (GAD) Focal nga si Renante Langut sa maong barangay maoy mikuyog ni Generalao nga nagdala sa bata ngadto sa Cebu City Medical Center aron masusi sa mga doktor. Nasuta nila nga naputos sa pinaakan sa lamok ang dagway sa bata ug sa pagkakaron gipaabot sa hospital nga may tagtungod nga mo-claim sa maong bata.(Lesley Caminade-Vestil/WC)

Operator og sakyanan gitigbas angol sa truckboy

Kritikal ang kahimtang sa 24 anyos nga anak og negosyante human kini tigbasa sa ilang truckboy kay nanghagis didto sa Sitio Uragay, barangay Korte, lungsod sa Carmen niadtong Lunes sa gabii.

Ang biktima mao si Juan Bernard Damiles, 24, ulitawo, apan adunay kapuyo ug operator og mga minibus sa amihanang Sugbo.

Samtang ang suspek mao ang ilang truckboy nga si Rengie Martil Dangcolos, 26, ulitawo, nga taga barangay Liboron, Carmen.

Si SPO2 Simplicio Gibo, desk officer sa Carmen Police Station mibutyag sa Banat News nga ang biktima may problemang personal nga wala nila ibutyag ug nanghagis sa ilang balay hinungdan nga nangayo og police assistance ang iyang inahan nga si Georgia.

Gitug-an sa suspek ngadto sa kapolisan nga wala na siya makapugong   dihang human niya niini og badlong siya nay giatubang busa milanit siya sa iyang sundang ug iya kining gihapsan.

Apan abtik kaayong nanagang ang biktima busa maayong pagkasamad sa tuong kamot niini ug sa   iyang dughan.

Gihatod dayon kini ngadto sa Danao District Hospital apan gi-transfer ngadto sa Vicente Sotto Memorial Medical Center sa dakbayan sa Sugbo.

Samtang ang suspek mitahan usab dayon sa kapolisan ug sa pagkakaron nagtingkagol na sa prisohan samtang nagpaabot sa tukmang kaso nga ipasaka batok kaniya. (BANAT NEWS)