CEBU, Philippines - Ang Department of Education (DepEd) sa Mandaue City Division hingpit nang nakapangandam sa tinuig nga Pasigarbo sa Sugbo karong tuiga.
Ang maong indigay nga pagahimoon sa dakong hawan sa atubangan sa Cebu International Convention Center (CICC) sa dakbayan sa Mandaue maoy kabahin sa mga kalihokan sa ika- 443 nga Founding Anniversary karong tuiga.
Si Belen Sanoria nga maoy DepEd division supervisor nga nahinabi sa Banat News sa iyang pamahayag miingon nga nagsugod na sa pagpangabot kagahapon ang mga contingents nga mosalmot sa Pasigarbo sa Sugbo karong Sabado sa hapon.
Matud pa niya nga kini ang hinungdan nga dunay mga pangpublikong tunghaan nga walay klase tungod kay gigamit kining temporaryong kapuy-an sa mga contingent gikan sa kalungsoran ug mga dakbayan dinhi sa lalawigan sa Sugbo.
Ang mga walay klase mao ang Cabancalan National High School I ug II sa barangay Cabancalan, Maguikay Elementary School sa barangay Maguikay, Don Gerardo Ouano Memorial High School sa barangay Opao, Mandaue City Central School sa barangay Centro, Subangdako Elementary School sa barangay Subangdaku ug uban pa.
Apan dili angay mabalaka ang mga tinun-an ug mga ginikanan nga mabiyaan sila sa ilang leksyon sanglit tapakan kini sa adlaw nga Sabado.
Sa nasayran nga kapin sa 40 ka mga contingents gikan sa kalungsoran dinhi sa lalawigan sa Sugbo maoy gipaabot nga mosalmot sa indigay sa mga festival sa kalungsoran ug dakbayan alang karong tuiga. ( EIM) - BANAT NEWS