Dalaga nga nag-videoke girakrakan

CEBU, Philippines - Patay nang nadangat sa tambalanan ang usa ka 18-anyos nga dalaga human kini gipusil sa duha ka mga lalaking nagmotor samtang ang biktima nagkantakanta sa videokihan daplin sa karsada kauban ang mga barkada niini didto sa Dr. Cesar St., Poblacion Uno siyudad sa Carcar alas 3:20 kagahapon sa kaadlawon.

Ang biktima nga naigo sa dughan ug namatay giilang si Mysa Plarisan, 18, nagpuyo sa sitio Cogon, Poblacion Uno sa maong siyudad.

Matud ni PO1 Jennis Lamosao sa Carcar City Police Station dihang nahinabi sa Banat News nagkantakanta ug nag-inom kauban sa mga higalang lalaki ang biktima gikan pa anang sayo sa gabii.

Ang mga mamumuno nga luwan og motorsiklo mihunong duol sa imnanan ug mipaulan og bala sa grupo sa biktima nga diha naglingkod sa gawas nga bahin. Ang biktima naigo sa dughan ug walang bahin sa bukton dayung sibat sa duha luwan sa usa ka motor, patay nang naabot sa Carcar City District Hospital si Plarisan.

 Base sa nahipos nga impormasyon sa kapulisan ang mga mamumuno gikan sa maong imnanan sayo nianang gabhiuna ug gikalalis kini sa grupo sa mga biktima. ( /EIM)   - BANAT NEWS