CEBU, Philippines - Ang Mines and Geosciences Bureau (MGB) 7 miluwat og pasidaan kagahapon kalabot sa posibilidad nga pagbaha ug pagdahili sa yuta bunga sa hanging habagat nga gisugnoran sa bagyong Haiku sa Taiwan.
Sumala ni MGB-7 Regional Director Loreto Alburo nga kinahanglang magbantay ang katawhan tungod mobundak sa kusog nga uwan niining semanaha subay sa taho sa weather bureau.
Mitug-an si Alburo nga ang kapin sa 80 ka mga barangay sa probinsya sa Sugbo humokon og yuta nga dali kaayong malusno inigkusog sa uwan busa peligro sa pagdahili.
Gibutyag ni Alburo nga gikinahanglan kaayo nga ang mga local chief executives magbantay sa kritikal nga mga lugar sa ilang tagsa-tagsa ka hurisdiksyon aron nga makalikay ang mga molupyo niini gikan sa epekto sa uwan sama sa pagdahili sa yuta ug pagbaha.
Sayo niini giseminar na sa MGB ang mga lokal nga opisyal bahin sa geohazards threat advisory ug gihatagan sila og mga kopya sa mga mahinungdanon unod niini.
Ang mga lugar nga gideklarar sa MGB 7 nga daling maigo sa baha ug pagdahili sa yuta kinahanglang monitoron gayud pag-ayo sa mga lokal nga opisyal sa goberno.
Girekomendar ni Alburo ngadto sa mga local chief executives ang pagdili sa pagpatukod og balay sa mga dapit nga gideklarar nga peligro sa landslide ug baha.
Dugang pa ni Alburo nga kinahanglang ang publiko dili gayud magkompiyansa ug kanunay nga mangandam aron kun may katalagman dali kaayo maapektohan.
Gisubli ni Alburo ang pasidaan nga dinhi sa dakbayan may lima ka barangay nga mamiligro sa baha ug landslide nga mao Kasambagan, Kinasang-an, Labangon, Mabolo, ug Bonbon, ug pito usab ang sa syudad sa Mandaue nga naglangkob sa Subangdaku, Mantuyong, Umapad, Opao, Alang-alang, Guizo ug Pakna-an. - Liezl M. Frasno-Correpondent/WC (BANAT NEWS)