CEBU, Philippines - Tulo ka mga menor de edad ang nangalumos usa kanila ang patay ug laing usa ang naa sa seryosong kahimtang samtang sila nangaligo sa dagat sa sitio Saw Mill, barangay Langtad, dakbayan sa Naga kagahapon sa alas 10:30 sa buntag.
Ang nakalas mao si Marjun Canque, taga barangay Pitalo, lungsod sa San Fernando kinsa na-missing pipila ka oras ug patay nang napalgan sa mga rescuers sa Philippine Coast Guard ug kabomberohan sa lungsod sa San Fernando.
Samtang naluwas sila si Annabelle Dejito, 14, taga sitio Guiuanon, barangay Langtad, Naga ug Panny Car Lastimosa, 14, taga barangay Pitalo, San Fernando kinsa giingong di makamaong molangoy ug nakainom og daghang tubig sa dagat. Si Lastimosa gidala sa South General Hospital apan gibalhin kini ngadto sa Vicente Sotto Memorial Medical Center tungod kay kini nakuyapan.
Ang tulo mga estudyante sa Langtad National High School kinsa giingong nag-relax human sa ilang periodical exams.
Si PO2 Ronjie Nadarra, duty desk officer sa Naga City Police Station mibutyag nga base sa imbestigasyon walo ka mga bata ang nangaligo sa maong dapit. Unom niini maoy nangaligo ug ang tulo misaka sa dike ug nangambak ngadto sa dagat apan gianod sa sulog palayo.
Matud ni Nadarra nga daling gitabang ni Dejito si Lastimosa apan silang duha hinuon ang nangaunlod. Si Canque pagkakita sa duha nga nangaunlod milangoy kini paduol apan giingong kalit usab mitidlom. Swerteng nakit-an sa truckboy sa sulod sa Philippine National Oil Corporation compound nga si Danilo Librero, 27, nakakita sa nagkapakapang mga bata ug daling misawom sa dagat apan sila si Dejito ug Lastimosa ray iyang naluwas.
Si Mayor Valdemar Chiong sa pakighinabi sa Banat News miawhag sa mga magtutudlo nga did-an ang mga tinun-an nga mangaligo sa dagat human sa ilang klase ilabi na karong dautan ang panahon. ( ug Nestle L. Semilla, USJR Intern/EIM) - BANAT NEWS