CEBU, Philippines - Dili makapasalig ang banay’ng Ouano sa dakbayan sa Mandaue nga mosuporta ang tibuok nilang pamilya sa kandidatura sa Liberal Party gubernatorial bet Hilario Davide III ug Bise-Gob. Agnes Magpale.
Si kanhi mayor Alfredo “Pedong” Ouano atol sa iyang pagtambong sa pagbukas sa One Cebu Expo sa Cebu International Convention Center kagahapon mibutyag nga siya makasuporta sa LP.
“Pero ang uban nako mga anak way seguro kay attached man kaayo sila sa mga Garcia, maayo unta mada nako,” nagkanayon ang 88- anyos nga Ouano.
Kaatbang ni Davide si Kong. Pablo John Garcia samtang ang ig-agaw ni Magpale nga si kanhi bise-mayor sa dakbayan sa Danao, Ramon “Boboy” Durano IV ang gikatahong magtigi sa pagkabise-gobernador.
Si Ouano ug anak nga si Konsehal Emmarie “Lolipop” Ouano-Dizon una nang nakighiusa sa kampo ni Mayor Jonas Cortes ubos sa LP. Apan ang laing anak ni Ouano nga si Bokal Thadeo “Teddy” Ouano pabiling sakop sa One Cebu Party sa mga Garcia. - BANAT NEWS